தமிழக சட்டமன்றத் தேர்தலில் வெற்றி பெற்று முதலமைச்சராகப் பொறுப்பேற்றுள்ள தமிழக வெற்றிக் கழகத் தலைவர் விஜய்க்கு, மலேசியப் பிரதமர் அன்வார் இப்ராகிம் தனது மனமார்ந்த வாழ்த்துகளைத் தெரிவித்துள்ளார். இது குறித்து அவர் வெளியிட்டுள்ள எக்ஸ் (X) தளப் பதிவில், தனது நண்பர் விஜய் தமிழக முதலமைச்சராகத் தேர்ந்தெடுக்கப்பட்டதற்கு மகிழ்ச்சி தெரிவிப்பதோடு, திரையில் ஊழல் அரசியல்வாதிகளை வீழ்த்திய விஜய், இப்போது நிஜ வாழ்க்கையில் மக்கள் நலனுக்கான பெரும் பொறுப்பை ஏற்றுள்ளதாகக் குறிப்பிட்டுள்ளார்.
மலேசியப் பிரதமர் தனது வாழ்த்துச் செய்தியில், விஜய்யின் ‘சர்க்கார்’ படத்தில் இடம்பெற்ற “ஒரு விரல் புரட்சி” என்ற பாடலை மேற்கோள் காட்டி நெகிழ்ச்சியை வெளிப்படுத்தியுள்ளார். அமைதியான மற்றும் ஜனநாயக ரீதியிலான இந்த “ஒரு விரல் புரட்சி” தற்போது தமிழகத்தில் வரலாறு படைக்கும் தருவாயில் உள்ளதாக அவர் பாராட்டியுள்ளார். விஜய்யின் அரசியல் வருகை மற்றும் வெற்றி குறித்து சர்வதேச அளவில் தலைவர்கள் வாழ்த்துவது குறிப்பிடத்தக்க ஒன்றாகப் பார்க்கப்படுகிறது.
மலேசியா மற்றும் தமிழ்நாடு இடையிலான ஆழமான கலாச்சார, வரலாற்று மற்றும் வர்த்தக உறவுகளைப் பிரதமர் அன்வார் இப்ராகிம் சுட்டிக்காட்டியுள்ளார். மலேசியாவில் வசிக்கும் லட்சக்கணக்கான தமிழ் மக்களின் உணர்வுகளையும், தமிழகத்துடனான நீண்டகால நட்புறவையும் கருத்தில் கொண்டு, வரும் காலங்களில் முதலமைச்சர் விஜய்யுடன் இணைந்து நெருக்கமாகப் பணியாற்ற விரும்புவதாகவும் அவர் தனது செய்தியில் உறுதிபடத் தெரிவித்துள்ளார்.