‘ஆமா, என் மனைவியை நான் தான் கொன்றேன்’… கணவர் கொடுத்த பகீர் வாக்குமூலம்… அதிர்ந்த போலீசார்…!

ஆஸ்திரேலியாவின் அடிலெய்டு நகரில் தனது மனைவியைக் கொன்றதாகக் குற்றம் சாட்டப்பட்ட இந்திய வம்சாவளியைச் சேர்ந்த விக்ராந்த் தாக்கூர் (42) என்ற நபர், நீதிமன்றத்தில் தனது குற்றத்தை ஒப்புக்கொண்டுள்ளார். கடந்த டிசம்பர் மாதம் 36 வயதான சுப்ரியா தாக்கூர் மயக்க நிலையில் கண்டெடுக்கப்பட்டு, பின்னர் உயிரிழந்தார். இந்த வழக்கில் விக்ராந்த் மீது கொலைக் குற்றம் சுமத்தப்பட்ட நிலையில், அவர் ஜனவரி 14 அன்று நீதிமன்றத்தில் ஆஜராகி, “நான் என் மனைவியைக் கொன்றேன், ஆனால் அது திட்டமிட்ட கொலை (Murder) அல்ல; அது எதிர்பாராத மரணம் (Manslaughter)” என்று வாதிட்டுள்ளார்.

நீதிமன்ற விசாரணையின் போது, திட்டமிட்டுச் செய்யப்படும் கொலைக்கும், உள்நோக்கமில்லாமல் நிகழும் மரணத்திற்கும் இடையிலான சட்டப்பூர்வ வேறுபாட்டைச் சுட்டிக்காட்டி விக்ராந்த் தரப்பு இந்த வாதத்தை முன்வைத்துள்ளது. கடந்த டிசம்பர் 21 அன்று காவல்துறையினர் அவர்களது இல்லத்திற்குச் சென்றபோது சுப்ரியா சுயநினைவின்றி இருந்ததாகவும், அவருக்கு முதலுதவி அளித்தும் பலனின்றி அவர் உயிரிழந்ததாகவும் தகவல்கள் தெரிவிக்கின்றன. இந்த வழக்கின் அடுத்தகட்ட விசாரணை வரும் ஏப்ரல் மாதம் நடைபெறும் என்று நீதிமன்றம் அறிவித்துள்ளது.

மறைந்த சுப்ரியா தாக்கூர் தனது மகனின் எதிர்காலத்திற்காக அயராது உழைத்தவர் என்றும், செவிலியராகப் பணிபுரியும் கனவோடு இருந்தவர் என்றும் அவரது நண்பர்கள் நெகிழ்ச்சியுடன் நினைவு கூர்ந்துள்ளனர். தாயை இழந்து தவிக்கும் அவரது மகனின் கல்வி மற்றும் எதிர்காலத் தேவைகளுக்காகச் சமூக வலைத்தளங்கள் மூலம் நிதி திரட்டப்பட்டு வருகிறது. இந்தச் சோகமான சம்பவம் ஆஸ்திரேலியாவில் வசிக்கும் இந்திய சமூகத்தினர் இடையே பெரும் அதிர்ச்சியையும் கவலையையும் ஏற்படுத்தியுள்ளது.