தமிழக சட்டமன்றத் தேர்தலை முன்னிட்டு மதுரை மாவட்ட அதிமுக வேட்பாளர் தேர்வு மற்றும் தொகுதிப் பங்கீடு குறித்த முக்கியத் தகவல்கள் வெளியாகியுள்ளன. அதிமுக பொதுச்செயலாளர் எடப்பாடி பழனிசாமி தலைமையில் நடைபெற்ற விருப்ப மனு நேர்காணலில், மதுரை மாவட்டத்தில் உள்ள 10 தொகுதிகளில் அதிமுக 8 தொகுதிகளில் நேரடியாகப் போட்டியிடத் திட்டமிட்டுள்ளது குறித்து ஆலோசிக்கப்பட்டது. கூட்டணிக் கட்சிகளுக்கான ஒதுக்கீட்டை மனதில் வைத்து இந்த முடிவு எடுக்கப்பட்டுள்ளதாகத் தெரிகிறது.
குறிப்பாக, தேமுதிக அதிமுக கூட்டணியில் இணையும் பட்சத்தில், மதுரை மாவட்டத்தில் கூட்டணிக் கட்சிகளுக்கு 3 இடங்கள் வரை ஒதுக்கப்பட வாய்ப்புள்ளது. அவ்வாறு தேமுதிக கூட்டணிக்கு வராத பட்சத்தில், பிற கூட்டணிக் கட்சிகளுக்கு 2 தொகுதிகளை மட்டும் ஒதுக்கிவிட்டு, மீதமுள்ள 8 தொகுதிகளில் அதிமுகவே களம் காணும் என்று எடப்பாடி பழனிசாமி நிர்வாகிகளிடம் தெரிவித்துள்ளார். நேரமின்மை காரணமாக இந்த முறை மாவட்ட வாரியாக ஒட்டுமொத்தமாக நேர்காணல் நடத்தப்படுவது குறிப்பிடத்தக்கது.
மதுரை மாவட்டத்தைப் பொறுத்தவரை முக்கியத் தொகுதிகளில் போட்டியிடும் வேட்பாளர்கள் குறித்த எதிர்பார்ப்பு அதிகரித்துள்ளது. மதுரை மேற்கில் செல்லூர் ராஜு, திருமங்கலத்தில் ஆர்.பி. உதயகுமார் மற்றும் திருப்பரங்குன்றத்தில் ராஜன் செல்லப்பா ஆகியோர் மீண்டும் போட்டியிடுவது கிட்டத்தட்ட உறுதி செய்யப்பட்டுள்ளது. மதுரை கிழக்கு உள்ளிட்ட மற்ற தொகுதிகளில் புதிய முகங்களுக்கு வாய்ப்பளிக்கப்படுமா அல்லது முன்னாள் சட்டமன்ற உறுப்பினர்கள் களமிறக்கப்படுவார்களா என்ற இறுதிப் பட்டியல் விரைவில் வெளியாகும் என எதிர்பார்க்கப்படுகிறது.