மனைவிக்கு மொட்டை அடித்து, தனது சிறுநீரை அருந்தும்படி தாக்கிய கணவன்… பிள்ளைகள் கண்முன்னே நடந்த அவலம்… உச்சக்கட்ட கொடூர சம்பவம்…!

சத்தீஸ்கர் மாநிலம் கோரியா மாவட்டத்தில் கணவனால் ஒரு பெண் கொடூரமான முறையில் சித்திரவதை செய்யப்பட்ட அதிர்ச்சி ஆவணங்கள் சமூக வலைத்தளங்களில் வெளியாகி ஒட்டுமொத்த நாட்டையும் உலுக்கியுள்ளது. சுமார் 15 ஆண்டுகளுக்கு முன்பு ஜிதேந்திர காசியா என்பவரை காதலித்து திருமணம் செய்து கொண்ட 30 வயதான தாரா என்ற பெண்ணுக்கே இந்த கொடூரம் நிகழ்ந்துள்ளது. கருத்து வேறுபாடு, வரதட்சணைக் கொடுமை மற்றும் நிதி நெருக்கடி காரணமாகத் தன் நான்கு குழந்தைகளுடன் கணவரைப் பிரிந்து தனியாக வாழ்ந்து வந்த தாரா, வீட்டுப் பணிப்பெண்ணாக வேலை செய்து தன் குடும்பத்தைக் காப்பாற்றி வந்துள்ளார்.

இந்த நிலையில், கடந்த ஜூன் 14 அன்று தாரா தங்கியிருந்த இடத்தை அவரது கணவர் ஜிதேந்திரா கண்டுபிடித்துள்ளார். தாராவிற்கு வேறு ஆண்களுடன் தொடர்பு இருப்பதாகக் கூறி, அவரை வீட்டை விட்டு வெளியே இழுத்து வந்து திட்டத் தொடங்கியுள்ளார். பின்னர், தாராவின் கைகளையும் கால்களையும் கயிற்றால் கட்டி, கண்மூடித்தனமாகத் தாக்கத் தொடங்கியுள்ளார். இத்துடன் நிறுத்தாமல், அவரது தலைமுடியை வெட்டி மொட்டை அடித்ததோடு, முகத்தில் கரியையும் இன்ஜின் ஆயிலையும் பூசி கொடூரமான முறையில் அவமானப்படுத்தியுள்ளார். மேலும், அவரை உயிருடன் எரித்துவிடுவதாகவும் மிரட்டல் விடுத்துள்ளார்.

இந்தக் கொடூரத்தின் உச்சமாக, தாராவின் சொந்தக் குழந்தைகளையே இந்த வன்முறையில் அவரது கணவர் ஈடுபடுத்தியுள்ளார். தாயை அடிக்குமாறு குழந்தைகளை வற்புறுத்தியதோடு, குழந்தைகள் முன்னிலையிலேயே தாராவை சிறுநீர் குடிக்குமாறு கட்டாயப்படுத்தியுள்ளார். பின்னர், அவரே தாராவின் முகத்தில் சிறுநீர் கழித்து, அதைத் குடிக்கும்படி கொடூரமாகத் தாக்கியுள்ளார். இந்தச் சம்பவங்கள் அனைத்தையும் ஒரு காணொளியாகப் பதிவு செய்து, அதில் தன் மனைவிக்கு வேறு ஆண்களுடன் தொடர்பு இருப்பதாகக் குற்றம் சாட்டியுள்ளார். ஆனால், தன் கணவர் ஆரம்பத்திலிருந்தே தன் மீது சந்தேகப்பட்டு, வரதட்சணைக் கொடுமை செய்து வந்ததாகப் பாதிக்கப்பட்ட பெண் கண்ணீருடன் மறுத்துள்ளார்.

பாதிக்கப்பட்ட பெண்ணின் புகாரின் அடிப்படையில், காவல்துறையினர் உடனடியாக வழக்குப்பதிவு செய்து முதற்கட்ட விசாரணையைத் தொடங்கினர். ஆரம்பத்தில் பாரதிய நியாய சம்ஹிதையின் கீழ் கணவனால் கொடுமைப்படுத்துதல், காயம் ஏற்படுத்துதல், ஆபாசமான செயல்கள் மற்றும் கொலை மிரட்டல் ஆகிய பிரிவுகளின் கீழ் எஃப்.ஐ.ஆர் பதிவு செய்யப்பட்டது. இருப்பினும், இந்தச் சம்பவத்தின் கொடூரமான காணொளி ஆதாரங்கள் வெளிவந்து, விசாரணையை அதிகாரிகள் தீவிரப்படுத்தியதை அடுத்து, குற்றம் சாட்டப்பட்டவர் மீது மேலும் பல கடுமையான பிரிவுகள் சேர்க்கப்பட்டு வருவதாகக் காவல்துறை தெரிவித்துள்ளது. எனக்கு நியாயமான நீதி கிடைக்க வேண்டும், குற்றவாளி கடுமையாகத் தண்டிக்கப்பட வேண்டும் என்று அந்தப் பெண் கோரிக்கை விடுத்துள்ளார்.