“15 வருட காதல்…. மனைவியையும் மாமியாரையும் ஒரே நேரத்தில்”…. கணவன் செய்த குலை நடுங்க வைக்கும் சம்பவம்….!

ஆந்திர மாநிலம் கிழக்கு கோதாவரி மாவட்டம் சீதாநகரம் மண்டலம், பொபிலங்கா கிராமத்தில் அரங்கேறியுள்ள இந்த இரட்டை கொலை சம்பவம் பெரும் அதிர்ச்சியை ஏற்படுத்தியுள்ளது. சீதாராமராஜு (36) மற்றும் லதா (31) தம்பதியர் காதலித்து திருமணம் செய்துகொண்டு 15 ஆண்டுகளாக வாழ்ந்து வந்த நிலையில், சீதாராமராஜுவுக்கு ஏற்பட்ட கள்ளத்தொடர்பு காரணமாக இருவருக்கும் இடையே கடும் கருத்து வேறுபாடு ஏற்பட்டது. இதன் விளைவாக, கடந்த எட்டு மாதங்களுக்கு முன்பு ஊர் பஞ்சாயத்து மூலம் இருவரும் முறைப்படி பிரிந்தனர். அதன் பின்னர், சீதாராமராஜு அந்தப் பெண்ணை இரண்டாவதாக திருமணம் செய்துகொண்டு வாழ்ந்து வந்தார்.

பிரிந்த பிறகு, லதா தனது பெற்றோரின் வீட்டில் வசித்து வந்தார். துரதிர்ஷ்டவசமாக, லதாவின் தாய் வீடும் சீதாராமராஜுவின் வீடும் ஒரே தெருவில் அமைந்திருந்ததால், அவர்கள் அடிக்கடி நேருக்கு நேர் சந்திக்க வேண்டிய சூழல் உருவானது. பிரிந்து சென்ற பின்பும், லதா தனது குடும்பத்தினருடன் மகிழ்ச்சியாக இருப்பதை சீதாராமராஜுவால் ஜீரணிக்க முடியவில்லை. இது குறித்து தனது நண்பர்களிடம் அடிக்கடி ஆத்திரத்துடன் பேசியதாகக் கூறப்படுகிறது.

இந்த நிலையில், லதா மீது தீராத பகை கொண்டிருந்த சீதாராமராஜு, தனது நண்பர்கள் இருவருடன் சேர்ந்து லதாவின் வீட்டிற்குள் அத்துமீறி நுழைந்தார். அங்கு கத்தியால் லதாவை சரமாரியாக வெட்டி படுகொலை செய்தார். இதைக் கண்டு தடுக்க ஓடிவந்த லதாவின் தாய் கும்மடி லட்சுமி மீதும் கொடூரமாக அரிவாளால் தாக்குதல் நடத்தப்பட்டது. இதில் தாய் மற்றும் மகள் இருவரும் ரத்த வெள்ளத்தில் சம்பவ இடத்திலேயே துடிதுடித்து உயிரிழந்தனர்.

தகவல் அறிந்து விரைந்து வந்த போலீசார், கொலையில் ஈடுபட்ட சீதாராமராஜுவை கைது செய்தனர். கொலைக்கு உடந்தையாக இருந்து தப்பி ஓடிய அவரது நண்பர்கள் இருவரையும் போலீசார் தீவிரமாகத் தேடி வருகின்றனர். ஒரு குடும்பத்தையே நிலைகுலையச் செய்த இந்த கொடூர சம்பவம், அந்த கிராம மக்களிடையே பெரும் சோகத்தையும் அச்சத்தையும் ஏற்படுத்தியுள்ளது.