உத்தரப் பிரதேச மாநிலம் ரேபரேலியில் உள்ள மாவட்ட அரசு மருத்துவமனையில், பெண் ஊழியர் ஒருவர் நோயாளி ஒருவரைத் தொடர்ச்சியாக எட்டி உதைத்து, கடுமையான வார்த்தைகளால் வசிக்கும் வீடியோ சமூக ஊடகங்களில் வெளியாகி பெரும் அதிர்வலையையும் கண்டனங்களையும் ஏற்படுத்தியுள்ளது. வைரலான அந்த வீடியோவில், சுமார் 35 நொடிகளில் அந்த ஊழியர் நோயாளியை 10 முறைக்கும் மேலாக காலால் உதைப்பதும், தகாத வார்த்தைகளால் திட்டுவதும் பதிவாகியுள்ளது. இந்த கொடூரமான மனிதநேயமற்ற செயலைக் கண்டித்த அதிகாரிகள், சம்பந்தப்பட்ட ஊழியர் மீது உடனடியாக நிர்வாக ரீதியிலான ஒழுங்கு நடவடிக்கை எடுத்து அவரைப் பணியிடை நீக்கம் செய்துள்ளனர்.
மாநிலத் துணை முதல்வர் பிரஜேஷ் பாதக்கின் உத்தரவைத் தொடர்ந்து, மாவட்ட மருத்துவமனையின் முதன்மை மருத்துவக் கண்காணிப்பாளர் டாக்டர் புஷ்பேந்திர குமார், அந்த பெண் ஊழியர் மருத்துவமனையில் துப்புரவுப் பணியாளராகப் பணிபுரிந்து வந்த பிங்கி என்பதை அடையாளம் கண்டுள்ளார். அவர் மீது 1956-ஆம் ஆண்டின் ஊழியர் நடத்தை விதிகளின் கீழ் ஒழுங்கு நடவடிக்கைகள் தொடங்கப்பட்டுள்ளன. மேலும், பணியிடை நீக்கக் காலத்தில் அவர் ஆயுஷ் வெளிநோயாளி பிரிவுக்கு மாற்றப்பட்டுள்ளார். இந்தச் சம்பவம் குறித்து காலக்கெடுவுக்குள் விரிவான விசாரணை நடத்தி அறிக்கை சமர்ப்பிக்க, எலும்பியல் நிபுணர் டாக்டர் தினேஷ் பிரதாப் சரோஜ், நுண்ணுயிரியலாளர் டாக்டர் ரிச்சா மற்றும் சிஸ்டர்-மேட்ரான் சுஷ்மா யாதவ் ஆகியோர் அடங்கிய மூன்று பேர் கொண்ட விசாரணைக் குழு அமைக்கப்பட்டுள்ளது.
இந்தச் சம்பவத்தைத் தொடர்ந்து, உத்தரப் பிரதேச மருத்துவ மற்றும் சுகாதாரத் துறையின் கூடுதல் தலைமைச் செயலாளர் அமித் குமார் கோஷ், மாநிலம் முழுவதும் உள்ள அனைத்து முதன்மை மருத்துவ அதிகாரிகளுக்கும் கடுமையான சுற்றறிக்கை ஒன்றை அனுப்பியுள்ளார். அதில், அனைத்து அரசு மருத்துவமனை ஊழியர்களும் சேவை நடத்தை விதிகளை முறையாகப் பின்பற்ற வேண்டும் என்றும், சிகிச்சைக்காக வரும் நோயாளிகளிடம் ஏதேனும் முறைகேடான அல்லது மனிதநேயமற்ற முறையில் நடந்துகொண்டால், அது எக்காரணம் கொண்டும் பொறுத்துக்கொள்ளப்படாது என்றும், அவர்கள் மீது மிகக் கடுமையான சட்ட நடவடிக்கை எடுக்கப்படும் என்றும் எச்சரித்துள்ளார்.