கோர விபத்து.. திடீரென வெடித்த பாய்லர்… 13 உயிர்களைக் குடித்த உயர் அழுத்த நீராவி கசிவு.. சக்தி மாவட்டத்தில் நடந்த பயங்கர சம்பவம்…!!!

சத்தீஸ்கர் மாநிலம் சக்தி மாவட்டம், சிங்கிதராய் கிராமத்தில் உள்ள வேதாந்தா லிமிடெட் தெர்மல் பவர் பிளாண்டில் கடந்த செவ்வாய்க்கிழமை பிற்பகல் சுமார் 2.30 மணியளவில் பயங்கர பாய்லர் வெடிப்பு விபத்து ஏற்பட்டது. நிலக்கரி எரிக்கும் கொதிகலன் குழாயில் ஏற்பட்ட உடைப்பு மற்றும் உயர் அழுத்த நீராவி கசிவு காரணமாக இந்த விபத்து நேரிட்டதாக முதற்கட்ட விசாரணையில் தெரியவந்துள்ளது. இந்த கோர விபத்தில் சம்பவ இடத்திலும், மருத்துவமனைக்கு செல்லும் வழியிலும் என மொத்தம் 13 தொழிலாளர்கள் உயிரிழந்துள்ளனர். மேலும் 21 பேர் படுகாயமடைந்து சிகிச்சை பெற்று வரும் நிலையில், அதில் 5 பேரின் நிலைமை கவலைக்கிடமாக உள்ளதால் பலி எண்ணிக்கை அதிகரிக்கக்கூடும் என அஞ்சப்படுகிறது.

பாதிக்கப்பட்ட தொழிலாளர்கள் பெரும்பாலும் ஜார்கண்ட் மற்றும் பீகார் மாநிலங்களைச் சேர்ந்த ஒப்பந்தத் தொழிலாளர்கள் ஆவர். விபத்து நடந்த சக்தி மாவட்டம் தலைநகர் ராய்ப்பூரிலிருந்து 200 கி.மீ தொலைவில் உள்ள ஒரு பின்தங்கிய பகுதி என்பதால், அங்கு போதிய அவசர மருத்துவ வசதிகள் இல்லை. இதனால் காயமடைந்தவர்கள் அண்டை மாவட்டங்களான கர்சியா மற்றும் ராய்கரில் உள்ள மருத்துவமனைகளுக்கு கொண்டு செல்லப்பட்டனர். உரிய நேரத்தில் நவீன சிகிச்சை கிடைத்திருந்தால் சில உயிர்களைக் காப்பாற்றியிருக்க முடியும் என சமூக ஆர்வலர்கள் ஆதங்கம் தெரிவித்துள்ளனர். இந்த சம்பவம் அந்த மாவட்டத்தில் சமீபகாலத்தில் நடந்த மிக மோசமான தொழிற்சாலை விபத்தாகக் கருதப்படுகிறது.

இந்த துயர சம்பவத்திற்கு பிரதமர் நரேந்திர மோடி மற்றும் சத்தீஸ்கர் முதலமைச்சர் ஆகியோர் ஆழ்ந்த இரங்கலைத் தெரிவித்ததுடன், உயிரிழந்தவர்களின் குடும்பங்களுக்கு நிதி உதவியையும் அறிவித்துள்ளனர். விபத்து குறித்து விரிவான நீதித்துறை விசாரணைக்கு உத்தரவிடப்பட்டுள்ள நிலையில், விசாரணைக்கு முழு ஒத்துழைப்பு வழங்குவதாக வேதாந்தா நிறுவனம் தெரிவித்துள்ளது. தற்போது தீயணைப்பு மற்றும் மீட்புப் படையினரின் துரித நடவடிக்கையால் தீ கட்டுக்குள் கொண்டு வரப்பட்டு, ஆலை வளாகத்தில் பாதுகாப்பு பலப்படுத்தப்பட்டுள்ளது. அண்மைக்காலங்களில் அதிகரித்துவரும் இத்தகைய தொழிற்சாலை விபத்துகள் தொழிலாளர் பாதுகாப்பு குறித்த கேள்விகளை எழுப்பியுள்ளன.