வங்கக் கடலில் புதிய புயல் சின்னம் உருவாக வாய்ப்புள்ளதைத் தொடர்ந்து, தமிழகத்தின் பல்வேறு மாவட்டங்களுக்கு இந்திய வானிலை ஆய்வு மையம் மீண்டும் ‘மஞ்சள் அலர்ட்’ விடுத்து எச்சரித்துள்ளது. இந்த வளிமண்டல சுழற்சியின் காரணமாக, தென் தமிழகம் மற்றும் கடலோர மாவட்டங்களில் பரவலாக மழை பெய்யக் கூடும் எனக் கணிக்கப்பட்டுள்ளது. குறிப்பாக தேனி, திண்டுக்கல், மதுரை, தூத்துக்குடி, ராமநாதபுரம், புதுக்கோட்டை மற்றும் சிவகங்கை ஆகிய 7 மாவட்டங்களில் இன்று இடி மின்னலுடன் கூடிய கனமழை பெய்ய வாய்ப்புள்ளதாகத் தெரிவிக்கப்பட்டுள்ளது.
மேலும் செங்கல்பட்டு, விழுப்புரம், கடலூர், மயிலாடுதுறை, நாகப்பட்டினம், திருவாரூர், தஞ்சாவூர், விருதுநகர், தென்காசி, திருநெல்வேலி மற்றும் கன்னியாகுமரி ஆகிய மாவட்டங்களில் மிதமான மழை பெய்யக்கூடும் என எதிர்பார்க்கப்படுகிறது. தொடர்ந்து மழை பெய்ய வாய்ப்புள்ளதால், தாழ்வான பகுதிகளில் வாழும் மக்களும், கடலுக்குச் செல்லும் மீனவர்களும் உரிய பாதுகாப்பு நடைமுறைகளைப் பின்பற்றி முன்னெச்சரிக்கையுடன் இருக்குமாறு அறிவுறுத்தப்பட்டுள்ளனர்.