தமிழகத்தில் பறவைக் காய்ச்சல் பீதி… “இனி ‘ஆப்-பாயில்’ சாப்பிடக்கூடாது”… பொதுமக்களுக்கு அரசு வெளியிட்ட பகீர் உத்தரவு…!

தமிழகத்தில் நிலவும் பறவைக் காய்ச்சல் அச்சுறுத்தலைக் கருத்தில் கொண்டு, பொதுமக்களுக்கு மாநில சுகாதாரத் துறை முக்கிய எச்சரிக்கையை விடுத்துள்ளது. குறிப்பாக, சென்னை அடையாறு உள்ளிட்ட பகுதிகளில் காகங்கள் அதிகளவில் உயிரிழந்ததைத் தொடர்ந்து மேற்கொள்ளப்பட்ட ஆய்வில், அவற்றுக்கு ‘ஹெச்5என்1’ (H5N1) வகை வைரஸ் தொற்று இருப்பது உறுதி செய்யப்பட்டுள்ளது. இதனால், பறவைகளிடமிருந்து மனிதர்களுக்குத் தொற்று பரவுவதைத் தடுக்க முன்னெச்சரிக்கை நடவடிக்கைகளை மேற்கொள்ளுமாறு அறிவுறுத்தப்பட்டுள்ளது. காய்ச்சல், இருமல், தொண்டை வலி மற்றும் சுவாசக் கோளாறுகள் போன்ற அறிகுறிகள் தென்பட்டால் உடனடியாக அருகில் உள்ள அரசு மருத்துவமனைகளை அணுக வேண்டும் என்று சுகாதாரத் துறை கேட்டுக்கொண்டுள்ளது.

பொதுமக்கள் தங்களின் உணவுப் பழக்கவழக்கங்களில் கூடுதல் கவனம் செலுத்துமாறு அறிவுறுத்தப்பட்டுள்ளனர். குறிப்பாக, சரியாகச் சமைக்கப்படாத அல்லது பச்சையான முட்டை மற்றும் இறைச்சி வகைகளை உண்பதைத் தவிர்க்க வேண்டும் என்று எச்சரிக்கப்பட்டுள்ளது. ‘ஆஃப் பாயில்’ (Half Boil) மற்றும் பச்சையான முட்டைகளை உண்பது ஆபத்தை விளைவிக்கக்கூடும் என்பதால், அவற்றை முற்றிலும் தவிர்ப்பது அவசியமாகும். மேலும், பறவை இறைச்சி கூடங்களில் பணிபுரிபவர்கள் மற்றும் பறவைகளைக் கையாளுபவர்கள் தகுந்த பாதுகாப்பு கவசங்களைப் பயன்படுத்தவும், கைகளைத் தூய்மையாக வைத்துக்கொள்ளவும் வலியுறுத்தப்பட்டுள்ளது. ஏதேனும் அசாதாரணமான முறையில் பறவைகள் உயிரிழந்தால், அது குறித்து உடனடியாக கால்நடை மருத்துவத் துறைக்குத் தகவல் தெரிவிக்குமாறு பொதுமக்களுக்கு வேண்டுகோள் விடுக்கப்பட்டுள்ளது.