கதறித் துடித்த 7 வயது சிறுவன்… பொது இடத்தில் இளம்தாயை வெறித்தனமாகக் குத்திக்கொன்ற காமுகன்…நெஞ்சை பதறவைக்கும் சம்பவம்…!!

அமெரிக்காவின் புரூக்ளின் பகுதியில் உள்ள லிங்கன் டெரஸ் பூங்காவில், ஷகீமா டேவிஸ் என்ற 30 வயது பெண் தனது ஏழு வயது குழந்தை மற்றும் நண்பர்களுடன் பார்பிக்யூ விருந்தில் ஈடுபட்டிருந்தபோது கொடூரமாகக் கொலை செய்யப்பட்டுள்ளார். இதற்கு முன்பு ஷகீமாவுடன் ஒருமுறை மட்டுமே பழகியதாகக் கூறப்படும் நபர் அங்கு வந்து, மீண்டும் தன்னிடம் பாலியல் ரீதியாக உறவு கொள்ளுமாறு அவரைத் தொடர்ந்து வற்புறுத்தியுள்ளார். அவரது கோரிக்கையை ஷகீமா திட்டவட்டமாக மறுத்ததால் இருவருக்கும் இடையே கடும் வாக்குவாதம் ஏற்பட்டுள்ளது. ஒருகட்டத்தில் ஆத்திரமடைந்த ஷகீமா அவர் மீது கையில் இருந்த பானத்தை வீசியுள்ளார். இதனால் இருவருக்கும் இடையிலான மோதல் முற்றிய நிலையில், தற்காப்பிற்காகப் பார்பிக்யூ கிரில்லை ஷகீமா எடுத்தபோது, அந்த நபர் தன்னிடம் இருந்த கத்தியால் ஷகீமாவின் தலை மற்றும் உடலில் சரமாரியாகக் குத்தியுள்ளார்.

ரத்த வெள்ளத்தில் சரிந்த ஷகீமா உடனடியாக மருத்துவமனைக்குக் கொண்டு செல்லப்பட்டாலும், அவர் ஏற்கனவே உயிரிழந்துவிட்டதாக மருத்துவர்கள் உறுதிப்படுத்தினர். இந்த நெஞ்சை பதறவைக்கும் சம்பவம் 10 முதல் 15 பேர் கொண்ட கூட்டத்தின் இடையேயும், குறிப்பாக அவரது சிறு வயதான மகனின் கண்முன்னே அரங்கேறியது பலரையும் அதிர்ச்சியில் ஆழ்த்தியுள்ளது. தன் குழந்தை முன்பாகவே ஒரு தாய் கொடூரமாகக் கொல்லப்பட்டதை எவ்விதத்திலும் ஏற்க முடியாது என அவரது தோழி வேதனையுடன் தெரிவித்துள்ளார். மேலும், அந்த நபருடன் தனது மகள் ஒருமுறை மட்டுமே வெளியே சென்றதாகவும், அவர் மீது எவ்வித விருப்பமும் இல்லை என தன்னிடம் கூறியதாகவும் ஷகீமாவின் 60 வயது தாய் ஆத்ரா பெக்யூஸ் குறிப்பிட்டுள்ளார். சம்பவ இடத்திலிருந்து தப்பியோடிய அந்த கொலையாளியைத் தீவிரமாகத் தேடி வரும் காவல்துறையினர், சந்தேக நபரின் புகைப்படத்தை வெளியிட்டு அவரைப் பிடிக்கப் பொதுமக்களின் உதவியைக் கோரியுள்ளனர்.