அடச்சீ “இது அரசு விழாவா இல்லை தவெக மாநாடா?.. மேடையை வளைத்த தொண்டர்கள்”… கடுப்பாகி வெளிநடப்பு செய்த அதிமுக எம்.எல்.ஏ ஓ.எஸ். மணியன்…!

நாகப்பட்டினம் மாவட்டம் தலைஞாயிறு பகுதியில் நடைபெற்ற அரசு சமுதாய வளைகாப்பு விழாவில், வேதாரண்யம் தொகுதி அதிமுக எம்.எல்.ஏ ஓ.எஸ். மணியன் பங்கேற்கச் சென்றபோது திடீர் பரபரப்பு ஏற்பட்டது. அரசு விழாவாக நடைபெற வேண்டிய இந்நிகழ்ச்சியில், தவெகவினர் மேடையை முழுமையாக ஆக்கிரமித்திருந்ததைக் கண்டு அவர் கடும் அதிர்ச்சி அடைந்தார். மேடை முழுவதும் தவெக துண்டு அணிந்த தொண்டர்கள் நாற்காலிகளை ஆக்கிரமித்து அமர்ந்திருந்ததால், அரசு அலுவலர்களுக்குக் கூட இருக்கைகள் கிடைக்காத சூழல் நிலவியது.

இது குறித்து செய்தியாளர்களிடம் பேசிய ஓ.எஸ். மணியன், மாவட்ட ஆட்சியர் மட்டுமே கலந்துகொள்வதாகக் கூறப்பட்டதால் தான் வந்ததாகவும், ஆனால் அங்கு நிகழ்ந்தது முற்றிலும் முரணாக இருந்ததாகவும் தெரிவித்தார். “இது அரசு விழாவா அல்லது தவெக விழாவா?” என்று கேள்வி எழுப்பிய அவர், தனது நீண்ட அரசியல் வாழ்க்கையில் அரசு நிகழ்ச்சிகளில் இதுபோன்ற இழிவான மற்றும் சட்டத்திற்குப் புறம்பான நிகழ்வை எப்போதுமே கண்டதில்லை என்று மனவேதனை தெரிவித்தார். இத்தகைய சூழலில் அந்த விழாவில் தான் பங்கேற்பது நியாயமில்லை எனக் கருதி உடனடியாக மேடையிலிருந்து வெளியேறியதாகக் கூறினார்.

முன்னதாக, தவெகவினர் அரசுப் பள்ளிகளில் ஆய்வு செய்வது மற்றும் விஜய் புகைப்படங்களை மாட்டுவது போன்ற செயல்களில் ஈடுபட்டு வந்ததாகப் பரவலான விமர்சனங்கள் எழுந்து வந்தன. மக்கள் பிரதிநிதிகள் மட்டுமே செய்ய வேண்டிய பணிகளில் மரபு மீறி தவெகவினர் தொடர்ச்சியாகத் தலையிட்டு வருவது அரசியல் வட்டாரங்களில் பெரும் விவாதப் பொருளாகியுள்ளது.

தற்போது அதிமுக எம்.எல்.ஏ ஓ.எஸ். மணியன் பகிரங்கமாக எழுப்பியுள்ள இந்தக் குற்றச்சாட்டு, அரசு நிகழ்வுகளில் அரசியல் கட்சிகளின் தலையீடு குறித்தும், அதிகாரிகளின் மௌனம் குறித்தும் தீவிரமான கேள்விகளை எழுப்பியுள்ளது. தவெகவினரின் இத்தகைய தொடர் செயல்பாடுகள் எதிர்காலத்தில் மேலும் பல சர்ச்சைகளுக்கு வழிவகுக்கலாம் என்ற அச்சத்தையும் அரசியல் பார்வையாளர்கள் மத்தியில் ஏற்படுத்தியுள்ளது.