காகித ரூபாய் நோட்டுகளுக்கு குட்பை?.. ரிசர்வ் வங்கியின் அடுத்த அதிரடி மாஸ்டர் பிளான்..!!

இந்தியாவில் தற்போது பயன்படுத்தப்படும் காகித ரூபாய் நோட்டுகளுக்குப் பதிலாக, நீண்ட நாட்கள் உழைக்கக்கூடிய பிளாஸ்டிக் (பாலிமர்) நோட்டுகளை அறிமுகப்படுத்துவது குறித்து இந்திய ரிசர்வ் வங்கி (RBI) தீவிரமாக ஆலோசித்து வருகிறது. தற்போது புழக்கத்தில் உள்ள ரூபாய் நோட்டுகள் பருத்தி கலந்த காகிதத்தில் தயாரிக்கப்படுவதால், அவை எளிதில் கிழிவதுடன், ஈரப்பதம் மற்றும் அதிக பயன்பாட்டால் விரைவில் சேதமடைகின்றன. இதன் காரணமாக, ஆண்டுதோறும் கோடிக்கணக்கான பழைய நோட்டுகளைத் திரும்பப் பெற்று, புதிய நோட்டுகளை அச்சிடுவதற்கான செலவு அரசாங்கத்திற்குப் பெருமளவில் உயர்ந்துள்ளது.

இந்த அச்சுச் செலவைக் குறைப்பதற்கும், ரூபாய் நோட்டுகளின் நீண்ட நாள் பயன்பாட்டை உறுதி செய்வதற்கும் பிளாஸ்டிக் நோட்டுகள் சிறந்த தீர்வாக இருக்கும் என ரிசர்வ் வங்கி கருதுகிறது. இந்த பாலிமர் நோட்டுகள் நீர், அழுக்கு மற்றும் கிழிவுக்கு எதிர்ப்புத் திறன் கொண்டவை ஆகும். மேலும், கள்ள நோட்டுகள் புழங்குவதைத் தடுக்கும் வகையில், வெளிச்சம் புகும் சாளரங்கள் (Transparent windows) மற்றும் ஹோலோகிராம் போன்ற மேம்பட்ட நவீன பாதுகாப்பு அம்சங்களும் இந்த புதிய பிளாஸ்டிக் நோட்டுகளில் இடம்பெற வாய்ப்புள்ளது.

இத்திட்டத்தின் முதற்கட்டமாக, ₹10 மற்றும் ₹20 மதிப்புள்ள குறைந்த மதிப்புடைய நோட்டுகளில் சோதனை முறையை (Pilot Project) அறிமுகப்படுத்த ஆர்பிஐ திட்டமிட்டுள்ளதாகத் தகவல்கள் தெரிவிக்கின்றன. உலக அளவில் ஏற்கனவே ஆஸ்திரேலியா, கனடா, இங்கிலாந்து, சிங்கப்பூர் உள்ளிட்ட பல நாடுகள் இந்த பாலிமர் நோட்டுகளை வெற்றிகரமாகப் பயன்படுத்தி வருகின்றன என்பது குறிப்பிடத்தக்கது. இந்தியாவில் கடந்த 2016-ஆம் ஆண்டிலேயே பிளாஸ்டிக் நோட்டுகளின் அறிமுகம் குறித்து நாடாளுமன்றத்தில் அரசு அதிகாரப்பூர்வமாக அறிவித்திருந்தது.

முன்னதாக, கடந்த 2012-ஆம் ஆண்டிலேயே இந்தியாவில் பாலிமர் நோட்டுகளைச் சோதனை அடிப்படையில் அறிமுகப்படுத்த முயற்சிகள் மேற்கொள்ளப்பட்டன. ஆனால், அப்போதைய ஏடிஎம் (ATM) இயந்திரங்கள் மற்றும் பணப் பரிவர்த்தனை சாதனங்களில் பிளாஸ்டிக் நோட்டுகளைக் கையாள்வதில் தொழில்நுட்பச் சிக்கல்கள் ஏற்பட்டதால் அந்த முயற்சி தற்காலிகமாக நிறுத்தப்பட்டது. தற்போது தொழில்நுட்ப வசதிகள் அனைத்தும் மேம்பட்டுள்ளதாலும், டிஜிட்டல் பரிவர்த்தனைகள் அதிகரித்த போதிலும் ரொக்கப் பணப் புழக்கம் தொடர்ந்து உயர்ந்து காணப்படுவதாலும், ரிசர்வ் வங்கி இத்திட்டத்தை மீண்டும் கையில் எடுத்துள்ளது.