சர்வதேசப் பொருளாதாரச் சூழல் மற்றும் மத்திய வங்கிகளின் தொடர் கொள்முதல் காரணமாக, வரும் 2026-ஆம் ஆண்டில் தங்கம் மற்றும் வெள்ளியின் விலை வரலாறு காணாத உச்சத்தை எட்டும் எனச் சந்தை நிபுணர்கள் கணித்துள்ளனர். கடந்த 2024 இறுதியில் 10 கிராம் தங்கம் ரூ.76,000-க்கு விற்பனையான நிலையில், தற்போது அது ஒரு லட்சத்தைத் தாண்டியுள்ளது. இதே வேகம் தொடர்ந்தால், 2026-ஆம் ஆண்டின் இறுதிக்குள் இந்தியாவில் 10 கிராம் தங்கம் சுமார் ரூ.1.5 லட்சம் முதல் ரூ.1.6 லட்சம் வரை உயர வாய்ப்புள்ளதாக கோல்ட்மேன் சாக்ஸ் மற்றும் கோடக் செக்யூரிட்டீஸ் போன்ற முன்னணி நிறுவனங்கள் எச்சரித்துள்ளன.
அதேபோல், தொழில்துறை தேவைகள் மற்றும் மின்சார வாகன உற்பத்தியில் வெள்ளியின் பயன்பாடு அதிகரித்துள்ளதால், அதன் விலையும் கணிசமாக உயரும் என்று எதிர்பார்க்கப்படுகிறது. தற்போது ஒரு கிலோ ரூ.2 லட்சத்தைத் தாண்டியுள்ள வெள்ளியின் விலை, அடுத்த ஆண்டில் ரூ.2.03 லட்சத்தைத் தொடக்கூடும் என மதிப்பீடுகள் தெரிவிக்கின்றன. அமெரிக்க பெடரல் வங்கியின் வட்டி விகிதக் குறைப்பு மற்றும் உலக நாடுகளிடையே நிலவும் பாதுகாப்பற்ற சூழல் ஆகியவை முதலீட்டாளர்களைத் தங்கத்தின் பக்கம் ஈர்ப்பதால், நடுத்தர மக்களுக்கு நகை வாங்குவது இனி பெரும் சவாலாகவே இருக்கும்.