“விஜய் அங்கிள் சொன்னது தான் எனக்கு நடந்துச்சு”… தந்தையை பதறவைத்த 8 வயது மகளின் வாக்குமூலம்.. நிஜத்தில் வெளிவந்த பகீர் சம்பவம்…!!

சென்னையை அடுத்த கே.கே. நகரில் வசிக்கும் 8 வயது சிறுமி, பெற்றோர் பிரிந்து வாழ்வதால் தனது தந்தையின் பாதுகாப்பில் வளர்ந்து வருகிறார். அவ்வப்போது சிறுமியைச் சந்திக்க வரும் அவரது தாய், தான் வேலை பார்க்கும் இடத்திற்கு குழந்தையை அழைத்துச் செல்வது வழக்கம். இந்த நிலையில், தந்தை தனது குழந்தைகளை சமீபத்தில் ஒரு திரைப்படத்திற்கு அழைத்துச் சென்றுள்ளார். அப்படத்தில் நடிகர் விஜய் ‘குட் டச், பேட் டச்’ குறித்து விளக்கும் விழிப்புணர்வுக் காட்சியைப் பார்த்த அந்தச் சிறுமி, தனது தாயின் பணிவிடத்தில் பெரியன் என்ற நபர் தன்னிடம் பாலியல் ரீதியாக அத்துமீறியதை உணர்ந்து, நடந்தவற்றை உடனடியாக தனது தந்தையிடம் தெரிவித்துள்ளார்.

மகளின் வார்த்தைகளைக் கேட்டு அதிர்ச்சியடைந்த தந்தை, இது தொடர்பாக வடபழனி அனைத்து மகளிர் காவல் நிலையத்தில் உடனடியாக புகார் அளித்தார். இந்தப் புகாரின் அடிப்படையில் தீவிர விசாரணை மேற்கொண்ட காவல்துறையினர், சிறுமியிடம் அத்துமீறிய நபர் மீது போக்சோ சட்டத்தின் கீழ் வழக்குப்பதிவு செய்து அவரை அதிரடியாகக் கைது செய்தனர். திரைப்படத்தில் இடம்பெற்ற ஒரு விழிப்புணர்வுக் காட்சியின் மூலம், தனக்கு நேர்ந்த அநீதியை ஒரு சிறுமி தைரியமாக வெளிப்படுத்தி குற்றவாளி கைது செய்யப்பட்டுள்ள இச்சம்பவம் பொதுமக்களிடையே பெரும் விழிப்புணர்வையும் பரபரப்பையும் ஏற்படுத்தியுள்ளது.