உத்தரப் பிரதேச மாநிலம் மீரட் அருகே தந்தை ஒருவரே தனது 12 வயது மகளை அடித்துக் கொன்ற அதிர்ச்சிகரமான சம்பவம் நிகழ்ந்துள்ளது. மளிகைக் கடை ஒன்றில் அந்தச் சிறுமி மிட்டாய்களைத் திருடியதாகக் கூறப்படுகிறது. இந்தத் தகவல் பால் விற்பனையாளரான அவரது தந்தைக்குத் தெரியவர, ஆத்திரமடைந்த அவர் சிறுமியை மிகக் கொடூரமாகத் தாக்கியுள்ளார். மகளின் அலறல் சத்தம் கேட்டுத் தடுக்க வந்த தாய் ஆர்த்தி தேவியையும் அவர் விட்டுவைக்காமல் சரமாரியாகத் தாக்கியுள்ளார்.
இந்தக் கொடூரத் தாக்குதலில் பலத்த காயமடைந்த சிறுமி, சிகிச்சை பலனின்றி பரிதாபமாக உயிரிழந்தார். ஒரு சிறிய தவறுக்காகத் தந்தை தன் மகளையே அடித்துக் கொன்ற இச்சம்பவம் அப்பகுதியில் பெரும் சோகத்தையும் அதிர்ச்சியையும் ஏற்படுத்தியுள்ளது. இது குறித்துத் தகவல் அறிந்த காவல்துறையினர் வழக்குப் பதிவு செய்து, தலைமறைவாக உள்ள தந்தையைத் தீவிரமாகத் தேடி வருகின்றனர். மேலும், இந்தச் சம்பவத்தின் பின்னணி குறித்து போலீசார் விரிவான விசாரணை நடத்தி வருகின்றனர்.