விழுப்புரம் மாவட்டம் செஞ்சி வட்டம் ஆலம்பூண்டி மற்றும் நடுப்பட்டு கிராம எல்லையில் வசிக்கும் கூலித் தொழிலாளி வடிவேலு – பவானி தம்பதியின் 7 வயது மகள் ஹேமலதா மாயமாகி 31 நாட்களைக் கடந்துள்ளது. கடந்த அக்டோபர் 11-ஆம் தேதி இரவு தனது பிறந்தநாளைக் கொண்டாடிவிட்டு, தாய் மற்றும் பாட்டியுடன் உறங்கிக் கொண்டிருந்த குழந்தை, மறுநாள் அதிகாலையில் மர்மமான முறையில் காணாமல் போனார். முதலில் உள்ளூர் சத்யமங்கலம் போலீசார் 10 நாட்கள் தேடியும் துப்பு கிடைக்காததால், வழக்கு சிபிசிஐடி-க்கு மாற்றப்பட்டது. கடந்த 21 நாட்களாகத் தனிப்படையினர் பல்வேறு கோணங்களில் தேடியும் எந்தவொரு உறுதியான தகவலும் கிடைக்காமல் வழக்கு தேக்கமடைந்திருந்தது.
இந்நிலையில், சென்னை சிபிசிஐடி காவல்துறை துணைத் தலைவர் (DIG) விக்ரமன் நேற்று நேரடியாகக் கிராமத்திற்கு வருகை தந்து அதிரடி கள விசாரணையைத் தொடங்கியுள்ளார். எஸ்பி ஜவகர் மற்றும் டிஎஸ்பிக்கள் வேல்முருகன், கீதா ஆகியோர் உடனிருக்க, சிறுமியின் பெற்றோரான வடிவேலு மற்றும் பவானியிடம் தனித்தனியாக அவர் விசாரணை நடத்தினார். பிறந்தநாள் கொண்டாட்டத்திற்குப் பிறகு வீட்டின் கதவு திறந்திருந்தது எப்படி, அன்றிரவு வீட்டில் என்ன நடந்தது மற்றும் முந்தைய வாக்குமூலங்களில் விடுபட்ட தகவல்கள் ஏதேனும் உள்ளதா என்பது குறித்து டிஐஜி விரிவாகக் கேட்டறிந்தார். மேலும், எதிர்வீட்டில் வசிக்கும் மஞ்சுளா என்ற பெண்ணிடமும் அன்றிரவு கேட்ட சத்தங்கள் மற்றும் நடமாட்டங்கள் குறித்து நேரடியாக விசாரித்து வாக்குமூலம் பெற்றார்.
இதனைத் தொடர்ந்து, சிறுமியின் வீட்டின் பின்புறம் அமைந்துள்ள அடர்ந்த முள் புதர்கள் மற்றும் சம்பவத்தன்று மோப்ப நாய் ஓடிய விவசாய நிலப் பகுதிகளை டிஐஜி விக்ரமன் அதிகாரிகளுடன் சேர்ந்து நேரில் ஆய்வு செய்தார். கிராமத்தைச் சுற்றியுள்ள மண் சாலைகள் மற்றும் தப்பிச் செல்வதற்கான வாய்ப்புள்ள வழித்தடங்களைப் பார்வையிட்ட அவர், ஏற்கனவே நடத்தப்பட்ட தேடுதல் பணிகள் குறித்துக் கேட்டறிந்தார். சுமார் ஒரு மணி நேரத்திற்கும் மேலாக நடைபெற்ற இந்த நேரடி கள ஆய்வுக்குப் பிறகு, சிபிசிஐடி முகாம் அலுவலகத்தில் அதிகாரிகளுடன் ஆலோசனை நடத்தினார்.
ஒரு மாதமாகியும் முன்னேற்றம் இல்லாத நிலையில், டிஐஜி நேரடியாகக் களத்தில் இறங்கியிருப்பது கிராம மக்களிடையே புதிய நம்பிக்கையை ஏற்படுத்தியுள்ளது. தற்போது வெளிமாநிலக் கடத்தல் கோணத்தில் விழுப்புரம், கடலூர், திருவண்ணாமலை ரயில் நிலைய சிசிடிவி காட்சிகள் மற்றும் நெடுஞ்சாலை லாரி வழித்தடங்கள் தீவிரமாக ஆய்வு செய்யப்படுகின்றன. அத்துடன், சரித்திரப் பதிவேடு குற்றவாளி ராஜதுரை மற்றும் அவரது கூட்டாளிகளின் நடமாட்டம், முந்தைய வாக்குமூலங்களில் உள்ள முரண்பாடுகள் ஆகியவற்றை ஒப்பிட்டு விடுபட்ட கண்ணிகளை இணைக்கும் பணியில் தனிப்படையினர் இறங்கியுள்ளதால், விரைவில் இந்த மர்மத்திற்கு விடை கிடைக்கும் என எதிர்பார்க்கப்படுகிறது.