உத்தரகாண்ட் மாநிலம் ரிஷிகேஷ் பகுதியில் படமாக்கப்பட்ட வீடியோ ஒன்று தற்போது சமூக வலைத்தளங்களில் மிக வேகமாகப் பரவி இணையவாசிகளின் இதயங்களை வென்று வருகிறது. அங்குள்ள வீட்டின் பால்கனியில் அமர்ந்திருந்த ‘ஜெர்மன் ஷெப்பர்ட்’ ரக நாய் ஒன்று, தெருவில் நடக்கும் சம்பவங்களைக் கூர்ந்து கவனித்துக் கொண்டிருந்தது.
அப்போது, சாலையில் சில சிறுவர்கள் ஓடி வர, அவர்களைத் துரத்திக் கொண்டு தெருநாய் ஒன்று வேகமாக வந்துள்ளது. இதைப் பார்த்ததும் சற்றும் யோசிக்காமல், அந்த ஜெர்மன் ஷெப்பர்ட் பால்கனியில் இருந்து கீழே குதித்து, அந்தத் தெருநாயை விரட்டியடித்துச் சிறுவர்களைப் பாதுகாத்துள்ளது. இந்தச் சம்பவத்தைக் கண்ட நெட்டிசன்கள் அந்த நாய்க்கு ‘டோகேஷ்’ எனப் பெயரிட்டு ‘பாடி கார்ட்’ எனப் பாராட்டி வருகின்றனர்.
நாடெங்கும் தெருநாய்கள் கடி மற்றும் வளர்ப்பு நாய்கள் தொடர்பான சர்ச்சைகளும் விவாதங்களும் அதிகரித்துள்ள இந்தச் சூழலில், குழந்தைகளைப் பாதுகாப்பது போல் அமைந்த இந்த 30 விநாடி வீடியோ காட்சிகள் மக்களுக்கு பெரும் நிம்மதியையும் மகிழ்ச்சியையும் அளித்துள்ளது.