தமிழகத்தில் அரசு மற்றும் அரசு உதவிபெறும் பள்ளிகளில் பணியாற்றி ஓய்வுபெறும் ஆசிரியர்களுக்கு, மே மாத ஊதியம் இனி வழங்கப்படாது எனப் பள்ளிக்கல்வித்துறை அதிரடி உத்தரவு பிறப்பித்துள்ளது. வழக்கமாக ஒரு கல்வியாண்டின் இடையில் ஓய்வுபெறும் ஆசிரியர்கள், மாணவர்களின் படிப்பு பாதிக்கப்படக் கூடாது என்பதற்காக அந்த ஆண்டு முடியும் வரை (மே மாதம் வரை) பணி நீட்டிப்பு பெறுவார்கள். இதற்காக அவர்களுக்கு மே மாத ஊதியமும் வழங்கப்பட்டு வந்தது.
இந்நிலையில், இத்தகைய பணி நீட்டிப்பால் அரசுக்குக் கூடுதல் நிதி இழப்பு ஏற்படுவதாகப் பள்ளிக்கல்வித்துறையின் தணிக்கைப் பிரிவு அறிக்கை அளித்தது. இதன் அடிப்படையில், கல்வியாண்டின் இறுதியில் தேர்வுகள் முடிந்த உடனேயே ஆசிரியர்களுக்குப் பணி ஓய்வு அளித்துவிட வேண்டும் என கடந்த 2022-ம் ஆண்டே அரசாணை வெளியிடப்பட்டது. இருப்பினும், முறையான செயல்முறை விளக்கம் மாவட்டக் கல்வி அலுவலர்களுக்கு அனுப்பப்படாததால், கடந்த மூன்று ஆண்டுகளாக ஆசிரியர்கள் மே மாத ஊதியத்துடனேயே ஓய்வு பெற்று வந்தனர்.
தற்போது தகவல் அறியும் உரிமைச் சட்டத்தின் கீழ் எழுப்பப்பட்ட கேள்விகளைத் தொடர்ந்து, 2022-ம் ஆண்டின் அரசாணையை உடனடியாக நடைமுறைப்படுத்தப் பள்ளிக்கல்வித்துறை உத்தரவிட்டுள்ளது. இதன்படி, 2025 ஜூன் 13-ம் தேதி முதன்மை கல்வி அலுவலர்களுக்கு அனுப்பப்பட்ட கடிதத்தில், ஓய்வுபெறும் ஆசிரியர்களுக்கு மே மாதம் வரை பணி நீட்டிப்பு வழங்க வேண்டாம் எனத் தெரிவிக்கப்பட்டுள்ளது. இந்த உத்தரவு பணி நிறைவு பெறும் ஆசிரியர்கள் மத்தியில் பெரும் அதிர்ச்சியை ஏற்படுத்தியுள்ளது.
இது குறித்துப் பள்ளிக்கல்வித்துறை இயக்குனர் கண்ணப்பன் விளக்கம் அளிக்கையில், அரசாணையை அமல்படுத்துவதில் இருந்த சந்தேகங்கள் குறித்து அரசிடம் விளக்கம் கேட்கப்பட்டதாகவும், அதன் அடிப்படையில் தற்போது தெளிவான வழிகாட்டுதல்கள் மாவட்ட அதிகாரிகளுக்கு அனுப்பப்பட்டுள்ளதாகவும் தெரிவித்தார். மூன்று ஆண்டுகள் தாமதத்திற்குப் பிறகு இந்த நிதிச் சிக்கன நடவடிக்கை தற்போது அமலுக்கு வந்துள்ளதால், இனிவரும் காலங்களில் ஆசிரியர்களுக்குக் கல்வியாண்டு இறுதி வரையிலான ஊதியப் பலன்கள் கிடைப்பதில் மாற்றம் ஏற்படும்.