தமிழக வெற்றிக் கழகத் தலைவர் விஜய், திரைத்துறையில் தனக்கிருக்கும் பெரும் செல்வாக்கின் காரணமாக அரசியல் களத்திலும் மக்கள் கூட்டத்தை காந்தம்போல ஈர்க்கிறார். அவர் செல்லும் இடமெல்லாம் ஆயிரக்கணக்கான இளைஞர்களும், பொதுமக்களும் திரள்வது ஒருபுறம் பலமாக இருந்தாலும், மறுபுறம் அதுவே அவருக்குப் பெரும் சவாலாக மாறியுள்ளது. குறிப்பாக, கரூரில் ஏற்பட்ட கூட்ட நெரிசல் மற்றும் கொளத்தூரில் பாதுகாப்பு குறைபாட்டால் பிரச்சாரம் செய்ய முடியாமல் திரும்பிய நிகழ்வுகள், நேரடிப் பிரச்சாரத்தில் இருக்கும் நடைமுறைச் சிக்கல்களை வெளிச்சம் போட்டுக்காட்டியுள்ளன.
கூட்டத்தைக் கட்டுப்படுத்த முடியாமல் போலீசார் திணறுவது, போக்குவரத்து நெரிசல் மற்றும் முதியவர்கள், பெண்கள் வெயிலில் மயக்கமடைவது போன்ற விரும்பத்தகாத சம்பவங்கள் கட்சியின் மீது சட்டரீதியான நெருக்கடிகளை உண்டாக்குகின்றன. ஒரு சில இடங்களில் உரிய போலீஸ் பாதுகாப்பு வழங்கப்படாதது விஜய்யின் பிரச்சாரத் திட்டங்களைப் பாதிக்கிறது. சட்டமன்றத் தேர்தல் நெருங்கும் வேளையில், தமிழகம் முழுவதும் சுற்றுப்பயணம் மேற்கொள்ள வேண்டிய கட்டாயம் அவருக்கு உள்ளது. ஆனால், ஒவ்வொரு முறையும் இதுபோன்ற அசம்பாவிதங்கள் ஏற்படுவது கட்சியின் நற்பெயருக்குப் பாதிப்பை ஏற்படுத்தக்கூடும் என்பதால் மாற்று ஏற்பாடுகள் குறித்து கட்சித் தலைமை ஆலோசித்து வருகிறது.
இந்தச் சவால்களைச் சமாளிக்க, விஜய் ‘டிஜிட்டல்’ உத்தியைக் கையில் எடுக்கத் திட்டமிட்டுள்ளதாகத் தெரிகிறது. அதன்படி, நேரடியாக மக்களைச் சந்திக்கும்போது ஏற்படும் நெரிசலைத் தவிர்க்க, தினமும் 20 நிமிடங்கள் ஆன்லைன் மூலம் உரையாற்ற அவர் முடிவெடுத்திருப்பதாகக் கூறப்படுகிறது. இந்த ஆன்லைன் உரையை தமிழகம் முழுவதும் கட்சியின் பிரச்சாரக் கூட்டங்களில் பெரிய திரைகள் மூலம் நேரலையாக ஒளிபரப்பவும், இதன் மூலம் மக்களைப் பாதுகாப்பாகச் சென்றடையவும் தவெக திட்டமிட்டுள்ளது. இந்த நவீனப் பிரச்சார முறை, கூட்ட நெரிசலைக் குறைப்பதோடு, அனைத்துத் தரப்பு மக்களையும் எளிதாகச் சென்றடையும் என எதிர்பார்க்கப்படுகிறது.