இவர்களுக்கு இலவச ரயில் பயணம்.. 75% வரை கட்டணச் சலுகை..! இந்திய ரயில்வேயின் அதிரடி அறிவிப்பு…!

இந்திய ரயில்வே தனது பயணிகளுக்குப் பல்வேறு வசதிகளை வழங்கி வரும் நிலையில், குறிப்பிட்ட சில பிரிவினருக்கு வாழ்நாள் முழுவதும் இலவச ரயில் பயணச் சீட்டுகளை வழங்குகிறது. குறிப்பாக, ராணுவம், கடற்படை மற்றும் விமானப்படையில் பணியாற்றி வீரதீர விருதுகளை வென்றவர்களுக்கும், அவர்களது மனைவி அல்லது விதவைகளுக்கும் இந்தச் சலுகை பொருந்தும். இவர்கள் முதல் வகுப்பு, இரண்டாம் வகுப்பு ஏசி மற்றும் ஏசி சேர் கார் ஆகியவற்றில் வாழ்நாள் முழுவதும் கட்டணமின்றிப் பயணிக்க அரசு உத்தரவிட்டுள்ளது.

இலவசப் பயணம் தவிர, கடுமையான நோய்களால் பாதிக்கப்பட்டவர்களுக்கு 75 சதவீதம் வரை கட்டணச் சலுகை வழங்கப்படுகிறது. புற்றுநோய், தாலசீமியா, தீவிர இதய நோய், சிறுநீரகக் கோளாறு (மாற்று அறுவை சிகிச்சை/டயாலிசிஸ்), ஹீமோபிலியா, காசநோய் மற்றும் எய்ட்ஸ் போன்ற நோய்களால் பாதிக்கப்பட்டவர்கள் சிகிச்சைக்காகச் செல்லும் போது இந்தச் சலுகையைப் பெறலாம். இவர்கள் பொதுப் பிரிவு (General), ஸ்லீப்பர் மற்றும் 3AC வகுப்புகளில் குறைந்த கட்டணத்தில் பயணிக்க முடியும். சில வகை நோயாளிகளுடன் வரும் ஒரு துணைக்கும் இதே போன்ற சலுகைகள் வழங்கப்படுகின்றன.

மாணவர்கள் மற்றும் மாற்றுத்திறனாளிகளுக்கும் ரயில்வேயில் சிறப்புக் கட்டணச் சலுகைகள் உள்ளன. ஊனமுற்றோர், பார்வைத்திறன் குறைபாடுள்ளோர் மற்றும் மனவளர்ச்சி குன்றியவர்கள் தங்களது பயணத்தின் போது 75 சதவீதம் வரை தள்ளுபடி பெறத் தகுதியுடையவர்கள். அதேபோல், கல்வி நிமித்தமாகத் தங்கள் சொந்த ஊர்களுக்குச் செல்லும் மாணவர்கள் அல்லது கல்விச் சுற்றுலா செல்லும் மாணவர்களுக்கும் அவர்கள் படிக்கும் வகுப்பு மற்றும் தூரத்தைப் பொறுத்து 50% முதல் 75% வரை சலுகைகள் வழங்கப்படுகின்றன.

இருப்பினும், கொரோனா பெருந்தொற்று காலத்திற்கு முன்பு வரை மூத்த குடிமக்களுக்கு வழங்கப்பட்டு வந்த 40% முதல் 50% வரையிலான கட்டணச் சலுகை தற்போது வரை மீண்டும் தொடங்கப்படவில்லை. இந்தச் சலுகையை மீண்டும் வழங்க வேண்டும் என்று பொதுமக்கள் தொடர்ந்து கோரிக்கை விடுத்து வருகின்றனர். தற்போது ரயில்வே அமைச்சகம் வழங்கியுள்ள விளக்கத்தின்படி, பொதுமக்களுக்கு ஏற்கனவே டிக்கெட் விலையில் கணிசமான மானியம் வழங்கப்படுவதால், மூத்த குடிமக்களுக்கான பிரத்யேக சலுகையை மீண்டும் கொண்டு வருவதற்கான வாய்ப்புகள் குறைவாகவே தென்படுகின்றன.