“அதிமுக டூ திமுக”.. ஒரே தாவலில் க்ளியரான 28 கோடி ரூபாய் வழக்கு…. வைத்திலிங்கத்திற்கு அடித்த மெகா ஜாக் பாட்… ஷாக்கான அரசியல் வட்டாரம்…!

கடந்த 2011-2016 ஆம் ஆண்டு அதிமுக ஆட்சிக்காலத்தில் வீட்டு வசதி மற்றும் நகர்ப்புற வளர்ச்சித்துறை அமைச்சராக இருந்த வைத்திலிங்கம் மீது, தனியார் கட்டுமான நிறுவனம் ஒன்றிற்கு முறைகேடாக அனுமதி வழங்கியதாகக் குற்றச்சாட்டு எழுந்தது. சென்னை பெருங்களத்தூரில் 2016 ஆம் ஆண்டு அடுக்குமாடி குடியிருப்புகள் கட்டுவதற்கு அனுமதி கோரிய தனியார் நிறுவனத்திடம் இருந்து, வைத்திலிங்கம் சுமார் ரூ.27.90 கோடி லஞ்சம் பெற்றதாக ‘அறப்போர் இயக்கம்’ சார்பில் லஞ்ச ஒழிப்புத்துறையில் புகார் அளிக்கப்பட்டது. இந்தப் புகாரின் அடிப்படையில், அவரது மகன்களுக்குச் சொந்தமான நிறுவனம் உள்ளிட்ட தரப்பினர் மீது கடந்த 2024 செப்டம்பர் 24 அன்று திமுக ஆட்சியில் லஞ்ச ஒழிப்புத்துறை முறைப்படி வழக்குப்பதிவு செய்து விசாரணையைத் தொடங்கியது.

இந்த லஞ்ச வழக்கு தீவிர விசாரணையில் இருந்த சூழ்நிலையில், அரசியல் அரங்கில் திடீர் திருப்பமாக முன்னாள் அமைச்சர் வைத்திலிங்கம் கடந்த ஜனவரி 21ஆம் தேதி ஆளும் திமுகவில் தன்னை இணைத்துக் கொண்டார். அவர் திமுகவில் இணைந்த சில வாரங்களிலேயே, அதாவது கடந்த பிப்ரவரி 25ஆம் தேதியன்றே இந்த வழக்கில் லஞ்ச ஒழிப்புத்துறை முக்கிய முடிவை எட்டியது. வைத்திலிங்கம் மீதான குற்றச்சாட்டுகளுக்குப் போதிய சான்றுகளோ அல்லது லஞ்சம் பெற்றதற்கான தகுந்த ஆதாரங்களோ இல்லை எனக் கூறி, இந்த வழக்கைக் கைவிடுவதாக லஞ்ச ஒழிப்புத்துறை முடிவு செய்தது.

இதனைத் தொடர்ந்து, வழக்கை முழுமையாக முடித்து வைப்பதாகக் கூறி சென்னை முதன்மை அமர்வு நீதிமன்றத்தில் லஞ்ச ஒழிப்புத்துறை சார்பில் கடந்த வாரம் இறுதி அறிக்கை (Closure Report) தாக்கல் செய்யப்பட்டுள்ளது. போதிய ஆதாரங்கள் கிடைக்கப் பெறாததால் இந்த வழக்கின் விசாரணையை மேற்கொண்டு தொடரத் தேவையில்லை என்று அந்த அறிக்கையில் லஞ்ச ஒழிப்புத்துறை அதிகாரிகள் தரப்பில் விளக்கமளிக்கப்பட்டுள்ளது. லஞ்ச ஒழிப்புத்துறையின் இந்த அறிக்கை சென்னை முதன்மை அமர்வு நீதிமன்றத்தில் வரும் ஜூன் 12 ஆம் தேதி விசாரணைக்கு வரவுள்ள நிலையில், அன்றைய தினம் நீதிமன்றம் இந்த அறிக்கை மீதான தனது இறுதி முடிவை அறிவிக்கும் என எதிர்பார்க்கப்படுகிறது.

தேர்தலுக்கு முன்னதாக எதிர்க்கட்சியில் இருந்த முக்கியத் தலைவர் ஒருவர் ஆளுங்கட்சியான திமுகவில் இணைந்ததும், அவர் மீதான பல கோடி ரூபாய் லஞ்ச வழக்கு லஞ்ச ஒழிப்புத்துறையால் அவசர அவசரமாக முடித்து வைக்கப்பட்டிருப்பது தமிழக அரசியல் வட்டாரத்தில் பெரும் சலசலப்பையும் விவாதத்தையும் ஏற்படுத்தியுள்ளது. அரசியல் காரணங்களுக்காகவே இந்த வழக்கு கைவிடப்பட்டதா என்ற விமர்சனங்கள் எழுந்துள்ள நிலையில், வரும் ஜூன் 12 அன்று நீதிமன்றம் லஞ்ச ஒழிப்புத்துறையின் அறிக்கையை ஏற்றுக்கொள்ளுமா அல்லது வழக்கில் வேறு ஏதேனும் உத்தரவைப் பிறப்பிக்குமா என்ற எதிர்பார்ப்பு பொதுமக்களிடையே அதிகரித்துள்ளது.