காங்கிரஸ் கட்சியின் மூத்த தலைவரும், மகாராஷ்டிர மாநில முன்னாள் அமைச்சருமான சுருப்சிங் நாயக் (88) உடல்நலக்குறைவு காரணமாக இன்று காலமானார். மகாராஷ்டிர மாநிலம் நவாப்பூர் தொகுதியில் இருந்து 1978-ம் ஆண்டு முதல் தொடர்ச்சியாக 8 முறை சட்டமன்ற உறுப்பினராக தேர்ந்தெடுக்கப்பட்டு சாதனை படைத்தவர். மகாராஷ்டிர அரசியலில் பழங்குடியின மக்களின் முகமாகத் திகழ்ந்தவர்.
இவரது மக்கள் சேவையைப் பாராட்டி, முன்னாள் பிரதமர் இந்திரா காந்தி இவரை ‘பழங்குடியினரின் சேவகன்’ என்று புகழாரம் சூட்டியுள்ளார். மகாராஷ்டிர அரசில் பல்வேறு முக்கிய அமைச்சரவைப் பொறுப்புகளை வகித்த இவர், பழங்குடியின நலனுக்காகப் பல்வேறு திட்டங்களைச் செயல்படுத்தியுள்ளார். இவரது மறைவுக்கு மகாராஷ்டிர துணை முதல்வர் அஜித் பவார், காங்கிரஸ் தலைவர்கள் மற்றும் பல்வேறு அரசியல் பிரமுகர்கள் தங்களது ஆழ்ந்த இரங்கலைத் தெரிவித்துள்ளனர்.