தமிழக அரசியல் களம் தற்போது சமூக வலைத்தளங்களில் கடுமையான விவாத மேடையாக மாறியுள்ளது. குறிப்பாக, அதிமுக முன்னாள் அமைச்சர் ஜெயக்குமார் தனது எக்ஸ் (X) சமூக வலைத்தளப் பக்கத்தில் பகிர்ந்துள்ள ஏ.ஐ. தொழில்நுட்பத்தால் உருவாக்கப்பட்ட புகைப்படம் பெரும் பரபரப்பை ஏற்படுத்தியுள்ளது. தமிழக முதலமைச்சர் விஜய்க்கு, சட்டமன்றத்தில் ஒரு மக்கள் பிரதிநிதியாக எவ்வாறு மாண்புடனும், பதவிக்குரிய பொறுப்புடனும் நடந்து கொள்ள வேண்டும் என்பது குறித்து ஜெயக்குமார் வகுப்பு எடுப்பது போல அந்தப் படம் வடிவமைக்கப்பட்டுள்ளது. அதோடு, சட்டமன்றம் என்பது சச்சரவு செய்யும் இடமல்ல, அது மக்களுக்குச் சேவை செய்யும் இடம் என்ற பொன்மொழியுடன், சட்டமன்ற மரபுகளைக் காக்க 8 முக்கிய வழிமுறைகளையும் அந்தப் பதிவில் அவர் பட்டியலிட்டுள்ளார்.
முதலமைச்சரின் செயல்பாடுகளைக் கடுமையாக விமர்சித்துள்ள ஜெயக்குமார், “நாளைய தீர்ப்பு” திரைப்படம் தொடங்கி இன்று மக்களின் தீர்ப்பால் விஜயானந்த் முதலமைச்சரானது வரை அவரது நடிப்பு நன்றாக வளர்ந்துள்ளதாகக் குறிப்பிட்டுள்ளார். இருப்பினும், சட்டமன்றத்தை பஞ்ச் டயலாக் பேசுவதற்கும், விசில் அடிப்பதற்கும், குட்டி கதைகள் சொல்வதற்கும் பயன்படுத்துவதன் மூலம் அதனை ஒரு ‘சூட்டிங் ஸ்பாட்’ போல மாற்றுவது தமிழ்நாட்டின் நலனுக்கு நல்லதல்ல என்று அவர் சாடியுள்ளார். “5 நிமிஷம் பேசுனதுக்கே என்னாச்சு தெரியும்ல” என்று முதலமைச்சர் விஜய் பேசியதைச் சுட்டிக்காட்டி, அதே கேள்வியைத்தான் நாங்களும் உங்களிடம் கேட்கிறோம் என்று அவர் எதிர்வினையாற்றியுள்ளார்.
தமிழகத்தின் தற்போதைய முக்கியப் பிரச்சினைகளான மின்வெட்டு, விவசாயிகளின் கோரிக்கைகள், பாலியல் வன்கொடுமைகள், சட்ட ஒழுங்கு சீர்கேடு மற்றும் தேர்தல் சமயத்தில் அள்ளி வீசப்பட்ட வாக்குறுதிகள் குறித்து முதலமைச்சர் ஒரு 5 நிமிடமாவது சட்டமன்றத்தில் பேச வேண்டும் என்று ஜெயக்குமார் வலியுறுத்தியுள்ளார். இறுதியாக, முதலமைச்சர் விஜய் ‘ரீல்ஸ்’ (Reels) போன்ற கற்பனை உலகை விட்டுவிட்டு, ‘ரியாலிட்டி’ எனப்படும் நிஜ உலகிற்கு வந்து மக்களின் உண்மையான பிரச்சினைகளுக்குத் தீர்வு காண வேண்டும் என்று தனது பதிவின் மூலம் ஆக்கப்பூர்வமான மற்றும் கடுமையான விமர்சனத்தை முன்வைத்துள்ளார்.