ஊத்தங்கரை தொகுதி தவெக எம்.எல்.ஏ இளையராஜாவிடம் குதிரை பேரம் நடத்தியதாகப் பதிவு செய்யப்பட்ட வழக்கில், திமுக முன்னாள் அமைச்சர் செந்தில் பாலாஜி சென்னை முதன்மை அமர்வு நீதிமன்றத்தில் நேரில் ஆஜராகி பிணைத்தொகையைச் செலுத்தினார். ஏற்கெனவே இந்த வழக்கில் 14 பேர் கைது செய்யப்பட்ட நிலையில், செந்தில் பாலாஜி மற்றும் அவரது சகோதரர் அசோக் குமார் ஆகியோரின் பெயர்களும் சேர்க்கப்பட்டன. கைது நடவடிக்கைக்கு பயந்து இருவரும் உயர்நீதிமன்றத்தை நாடி நிபந்தனை முன்ஜாமீன் பெற்றிருந்த நிலையில், தற்போது அதன் தொடர்ச்சியாகச் சட்ட நடைமுறைகள் பூர்த்தி செய்யப்பட்டுள்ளன.
முன்னதாக, தங்களுக்கு முன்ஜாமீன் வழங்கப்பட்ட பிறகும் காவல்துறை சோதனைகள் என்ற பெயரில் துன்புறுத்துவதாகக் கூறி, செந்தில் பாலாஜி தரப்பில் சென்னை உயர்நீதிமன்றத்தில் மனு ஒன்று தாக்கல் செய்யப்பட்டது. விசாரணைக்கு முழு ஒத்துழைப்பு அளிக்கத் தயாராக இருக்கும் நிலையில், இத்தகைய கெடுபிடிகளைத் தவிர்க்க உத்தரவிட வேண்டும் எனக் கோரப்பட்டது. இருப்பினும், முன்ஜாமீன் பெற்ற பிறகு இன்னும் முறைப்படி சரணடையாத நிலையில், காவல்துறையினருக்கு முன்கூட்டியே இத்தகைய உத்தரவைப் பிறப்பிக்க முடியாது எனக் கூறி அந்த மனுவை நீதிமன்றம் தள்ளுபடி செய்தது.
இதனைத் தொடர்ந்து, நீதிமன்ற உத்தரவை மதித்து பிணைத்தொகையை செலுத்துவதற்காகச் செந்தில் பாலாஜி சென்னை முதன்மை அமர்வு நீதிமன்றத்தில் ஆஜரானார். பிணைத் தொகையைச் செலுத்தும் நடைமுறைகள் அனைத்தும் முறைப்படி நிறைவடைந்ததைத் தொடர்ந்து, அவருக்கு நிபந்தனையுடன் கூடிய ஜாமீனை வழங்கி நீதிமன்றம் அதிகாரப்பூர்வமாக உத்தரவிட்டது. இதன் மூலம் இவ்வழக்கில் அவரது கைது நடவடிக்கை தற்காலிகமாகத் தவிர்க்கப்பட்டுள்ளது.
நீதிமன்றத்தின் இந்த உத்தரவின்படி, முன்னாள் அமைச்சர் செந்தில் பாலாஜி நாளை முதல் சென்னை திருவல்லிக்கேணி காவல் நிலையத்தில் தினமும் நேரில் ஆஜராக வேண்டும். தினமும் காலை 10.30 மணிக்கும் மற்றும் மாலை 5.30 மணிக்கும் காவல் நிலையத்தில் ஆஜராகிக் கையெழுத்திட வேண்டும் என்ற கடுமையான நிபந்தனையுடன் அவருக்கு ஜாமீன் அளிக்கப்பட்டுள்ளது. அதன்படி, அவர் நாளையிலிருந்து காவல் நிலையத்தில் கையெழுத்திடுவார் என்று எதிர்பார்க்கப்படுகிறது.