தமிழக அரசியலில் ‘தமிழக வெற்றிக் கழகம்’ ஏற்படுத்தி வரும் தாக்கம் நாளுக்கு நாள் தீவிரமடைந்து வருகிறது. சமீபத்தில் 6 அதிமுக எம்.எல்.ஏ-க்கள் தவெகவில் இணைந்த நிலையில், “இன்னும் 10 முதல் 20 அதிமுக நிர்வாகிகள் தவெகவில் இணையத் தயாராக இருக்கிறார்கள்” என்று செங்கோட்டையன் கூறியிருந்த கருத்து அரசியல் வட்டாரத்தில் பெரும் புயலைக் கிளப்பியது. அதிமுகவின் உட்கட்சி அமைப்பில் இந்த இடப்பெயர்வு ஏற்கனவே பெரும் சலசலப்பை ஏற்படுத்தியிருந்த சூழலில், அடுத்தடுத்து வெளியாகும் தகவல்கள் எதிர்க்கட்சித் தலைமையை மேலும் யோசிக்க வைத்துள்ளன.
இந்த பரபரப்பிற்கு இடையே, சேலம் மாவட்டம் ஓமலூரில் நடந்த ஒரு திருமண விழாவில் தவெகவில் இணைந்த முன்னாள் அமைச்சர் சி. விஜயபாஸ்கருடன், அதிமுகவின் முன்னாள் அமைச்சர்களான தங்கமணி மற்றும் அன்பழகன் ஆகியோர் மிகவும் சகஜமாக சிரித்து பேசும் வீடியோ சமூக வலைதளங்களில் வைரலாகி வருகிறது. வரவிருக்கும் இடைத்தேர்தலில் மிகப்பெரிய வெற்றியைப் பெற்று தன் செல்வாக்கை நிரூபிக்கக் காத்திருக்கும் அதிமுக பொதுச்செயலாளர் எடப்பாடி பழனிசாமிக்கு (EPS), தனது சொந்த மாவட்டத்திலேயே அரங்கேறிய இந்தச் சந்திப்பு பெரும் கலக்கத்தை ஏற்படுத்தியுள்ளதாகக் கூறப்படுகிறது. மூத்த தலைவர்களின் இந்த நெருக்கம், அதிமுகவிலிருந்து தவெகவை நோக்கிய அடுத்தகட்ட நகர்வுகளுக்கு அஸ்திவாரமோ என்ற விவாதத்தையும் கிளப்பியுள்ளது.