பெண்களுக்கு ஏற்படும் பிரசவ வலியை விட கொடூரமான வலியை தருவதுதான் சிறுநீரக கல் பிரச்னை. அதை அனுபவித்தவர்களுக்கு அந்த கொடுமை தெரியும். இந்தியர்களில் 12 சதவீதம் பேருக்கு சிறுநீரக கல் பிரச்சனை இருப்பதாக அலபாமா பல்கலைக்கழகம் நடத்திய ஆய்வில் தகவல் வெளியாகி உள்ளது. சிறுநீரகங்களில் உருவாகும் கடினமான கனிமத்துகளே சிறுநீரக கற்கள் என அறியப்படுகிறது.
அமெரிக்காவில் உள்ள அலபாமா பல்கலைக்கழகம் சிறுநீரக கல் குறித்து ஆய்வு நடத்தியது. இதில் இந்தியர்கள் 12 சதவீதம் பேருக்கும் வட இந்தியாவில் மட்டும் 15 சதவீத பேருக்கும் இந்த பிரச்சனை இருப்பது கண்டறியப்பட்டுள்ளது.மேலும் 20 முதல் 40 வயதுக்குள் இருப்பவர்களில் 30 முதல் 40 சதவீதம் வரை சிறுநீரக கல் பிரச்னையால் பாதிக்கப்பட்டு இருப்பது கணக்கிடப்பட்டுள்ளது.
அதிக அளவில் ஆக்சலைட் உள்ள உணவுகளான பசலைக்கீரை உருளைக்கிழங்கு பருப்பு வகைகள் தேன் சாக்லேட் உப்பு மற்றும் புரதம் அதிகமான உணவுகளை உண்பதே சிறுநீரக கற்களை ஏற்படுத்தும் என டாக்டர்கள் கூறுகின்றனர். இந்த சிறுநீரக கல் பாதிப்பு இருப்போர் குறிப்பிட்ட இந்த உணவுகளை கண்டிப்பாக தவிர்க்க வேண்டும். தினசரி 2 லிட்டர் தண்ணீர் குடிக்க வேண்டும் என்றும் டாக்டர்கள் அறிவுறுத்தி உள்ளனர்.