தெலங்கானா மாநிலம் முழுவதும் உள்ள உணவகங்களில் உணவுப் பாதுகாப்புத் துறை அதிகாரிகள் அதிரடி ஆய்வு மேற்கொண்டனர். மாநிலம் முழுவதும் சுமார் 46 உணவகங்களில் நடத்தப்பட்ட இந்த தீவிர சோதனையில், பல கடைகளில் அதிர்ச்சியளிக்கும் முறைகேடுகள் வெளிச்சத்திற்கு வந்துள்ளன.
அங்கிருந்த உணவகங்களில் கெட்டுப்போன உணவுகள், பூச்சிகள் மொய்க்கும் சுகாதாரமற்ற சூழல் மற்றும் காலாவதியான உணவுப் பொருட்கள் பயன்படுத்தப்பட்டது கண்டுபிடிக்கப்பட்டது. இதையடுத்து, 22 உணவு மாதிரிகளைப் பிரத்யேகப் பரிசோதனைக்காகச் சேகரித்த அதிகாரிகள், விதிமுறைகளை மீறிய 23 உணவகங்களுக்கு உடனடியாகச் சீரமைக்கக் கோரி நோட்டீஸ் அனுப்பியுள்ளனர்.
மேலும், மிக மோசமான நிலையில் இயங்கி வந்த 3 உணவகங்களை உடனடியாக மூட உத்தரவிட்ட அதிகாரிகள், அவற்றின் FSSAI உரிமங்களைத் தற்காலிகமாகச் சஸ்பெண்ட் செய்துள்ளனர். உணவகங்களில் பொதுமக்களின் ஆரோக்கியத்தைச் சீரழிக்கும் வகையில் நடந்த இந்த அதிரடி சோதனை உணவுப்பிரியர்கள் மத்தியில் பெரும் அதிர்ச்சியை ஏற்படுத்தியுள்ளது.