ஜப்பானியப் பெண்ணைச் சூழ்ந்த 5 காமவெறியர்கள்… தைரியமாகச் சத்தமிட்ட பெண்… நடுநடுங்கித் தப்பியோடிய இளைஞர்கள்… போலீஸ் அதிரடி வேட்டை…!!!

ராஜஸ்தான் மாநிலம் ஜெய்ப்பூரில் உள்ள உலகப் புகழ்பெற்ற ஜெய்கர் கோட்டைக்குச் சென்ற ஜப்பானியப் பெண் சுற்றுலாப் பயணி ஒருவர், ஐந்து இளைஞர்களால் பாலியல் ரீதியாகத் துன்புறுத்தப்பட்ட அதிர்ச்சிகரமான சம்பவம் நிகழ்ந்துள்ளது. ஞாயிற்றுக்கிழமை காலை கோட்டையைப் பார்வையிடச் சென்ற அந்தப் பெண், கணேஷ் போல் பகுதியில் தனியாக இருந்தபோது, அவரைச் சூழ்ந்துகொண்ட மர்ம நபர்கள் தகாத முறையில் நடந்துகொண்டனர். பாதிக்கப்பட்ட பெண் தைரியமாகச் சத்தமிடவே, பாதுகாப்பு ஊழியர் வருவதைக் கண்ட கும்பல் அங்கிருந்து தப்பியோடியது.

இந்தச் சம்பவம் குறித்து ஆமெர் காவல் நிலையத்தில் புகார் அளிக்கப்பட்டதைத் தொடர்ந்து, காவல்துறையினர் சிசிடிவி காட்சிகளை ஆய்வு செய்தனர். அதில் ஐந்து இளைஞர்கள் மலையிலிருந்து வேகமாக இறங்கி ஓடுவது பதிவாகியுள்ளது. அடையாளங்கள் உறுதி செய்யப்பட்டுள்ளதாகவும், உள்ளூர் குற்றவாளிகள் மற்றும் சந்தேகத்திற்குரிய சுற்றுலா வழிகாட்டிகளிடம் விசாரணை நடத்தி வருவதாகவும் காவல் நிலைய அதிகாரி கௌதம் டோடாசரா தெரிவித்துள்ளார். குற்றவாளிகள் விரைவில் கைது செய்யப்படுவார்கள் எனப் போலீசார் உறுதியளித்துள்ளனர்.

ஜெய்ப்பூரில் கடந்த ஒன்பது நாட்களில் வெளிநாட்டுப் பெண்களுக்கு எதிராக நடக்கும் இரண்டாவது பெரிய வன்முறைச் சம்பவம் இதுவாகும். சில நாட்களுக்கு முன்புதான் ஜல் மஹால் பகுதியில் செல்ஃபி எடுப்பதாகக் கூறி ஒரு வெளிநாட்டுப் பெண்ணை கும்பல் ஒன்று சூழ்ந்து துன்புறுத்தியது. “வந்தாரை வாழவைக்கும்” ராஜஸ்தான் சுற்றுலாவின் நற்பெயருக்கு இதுபோன்ற தொடர்ச்சியான அத்துமீறல்கள் பெரும் களங்கத்தை ஏற்படுத்தி வருவதாக சமூக ஆர்வலர்கள் கவலை தெரிவிக்கின்றனர்.