தமிழ்நாட்டில் உள்ள ரேஷன் கடைகளில் தற்பொழுது நடைமுறையில் இருக்கும் விரல் ரேகை பதிவுக்குப் பதிலாக, ‘முக அங்கீகாரம்’ மூலம் அத்தியாவசியப் பொருட்களை விநியோகிக்கும் புதிய தொழில்நுட்ப முறை விரைவில் அறிமுகப்படுத்தப்பட உள்ளது. ரேஷன் கடைகளில் நடக்கும் முறைகேடுகளையும், குளறுபடிகளையும் முழுமையாகத் தடுக்கும் நோக்கில் இத்திட்டம் கொண்டுவரப்படவுள்ளதாக உணவு மற்றும் நுகர்வோர் பாதுகாப்புத்துறை அமைச்சர் வெங்கடரமணன் தெரிவித்துள்ளார். இது குறித்து முதலமைச்சர் சி.ஜோசப் விஜய்யுடன் விரிவான ஆலோசனைகள் மேற்கொள்ளப்பட்டு, தொழில்நுட்ப ரீதியிலான ஆய்வுகள் முடிந்த பின்னர் இப்புதிய முறை பயன்பாட்டுக்கு வரும் என அவர் குறிப்பிட்டுள்ளார்.
மேலும், நுகர்வோருக்குத் தரமான அரிசி விநியோகிக்கப்படுவதை உறுதி செய்வதற்காக நெல் சேமிப்புக் கிடங்குகள் மற்றும் அரவை மில்களில் அதிகாரிகள் தொடர் ஆய்வுகளை மேற்கொண்டு வருகின்றனர். இதன் மூலம் இன்னும் ஒரு மாதத்திற்குள் மக்கள் அனைவரும் பயன்பெறும் வகையில் உயர்தர அரிசி தடையின்றிக் கிடைக்க வழிவகை செய்யப்படும் என்றும் அமைச்சர் உறுதியளித்துள்ளார். அதோடு, புதிய குடும்ப அட்டைகளுக்காகக் காத்திருப்பவர்களின் விண்ணப்பங்கள் விரைவாகப் பரிசீலிக்கப்பட்டு, எவ்வித தாமதமும் இன்றி ஸ்மார்ட் ரேஷன் கார்டுகள் உடனுக்குடன் வழங்கப்படும் என்றும் அரசு தரப்பில் தெரிவிக்கப்பட்டுள்ளது.