சமூக ஊடகங்களில் தற்போதைய காலகட்டத்தில் ஒரு சுவாரசியமான மற்றும் அன்பான குடும்ப வீடியோ வைரலாகி வருகிறது. பொதுவாக இளைஞர்கள் தங்களது காதலியின் வீட்டிற்குச் செல்லும்போது சற்று பயத்துடனும் தயக்கத்துடனும் காணப்படுவது வழக்கம். ஆனால், இந்த வீடியோவில் உள்ள காதலியின் பெற்றோர்கள், தங்கள் மகளின் காதலனை வீட்டிற்கு அழைத்து மிகவும் அன்போடு உபசரித்துள்ளனர். அந்தப் பெண்ணின் தந்தை, வீட்டிற்கு வந்த காதலனுக்காகத் தனது கைகளாலேயே மட்டன் சாதம் சமைத்துக் கொடுத்து, அவரே தட்டையும் எடுத்துக்கொண்டு வந்து பரிமாறும் காட்சி இணையவாசிகளின் இதயங்களை வென்றுள்ளது.
மட்டன் சாதத்தைப் பரிமாறிய பிறகு, அந்தப் பெண்ணின் தந்தை அதன் சுவை எப்படி இருக்கிறது என்று தெரிந்துகொள்ள ஆர்வமாக அங்கே காத்திருந்தார். அப்போது தரையில் அமர்ந்திருந்த அந்தப் பெண்ணின் தாய் நகைச்சுவையாக, “சமையல் நன்றாக இல்லாவிட்டாலும், அவன் ‘அங்கிள் சமையல் நன்றாக இருக்கிறது’ என்றுதான் சொல்வான்” என்று வம்புகிழுத்தார். மேலும், அந்த இளைஞனிடம், “என் சமையல் நன்றாக இருக்கிறதா அல்லது அங்கிள் சமையல் நன்றாக இருக்கிறதா?” என்ற தர்மசங்கடமான கேள்வியைக் கேட்டு விளையாடினார். இதனால் அந்த இளைஞன் வெட்கப்பட்டு, இருவரின் சமையலும் நன்றாக இருப்பதாகக் கூறி அங்கிருந்த சூழ்நிலையைச் சமாளித்தார்.
https://www.instagram.com/reel/DZVKrLcN_Yq/?utm_source=ig_web_button_share_sheet
இந்த அழகிய தருணத்தை அந்தப் பெண் தனது இன்ஸ்டாகிராம் பக்கத்தில் பகிர்ந்துள்ளார். அதில், “சில நாட்கள் எங்கள் வீட்டிற்கு விருந்தினராக வந்த என் காதலனை, என் பெற்றோர் எவ்வளவு அன்பாக நடத்துகிறார்கள் என்று பாருங்கள். இவ்வளவு முற்போக்கான மற்றும் பரந்த மனப்பான்மை கொண்ட பெற்றோரைப் பெற நான் உண்மையிலேயே கொடுத்து வைத்தவள்” என்று பதிவிட்டுள்ளார். இந்த வீடியோவைக் கண்ட நெட்டிசன்கள், “இப்படி ஒரு மாமனார் மற்றும் மாமியாருக்குக் கொடுத்து வைத்திருக்க வேண்டும், அந்த இளைஞன் மிகவும் அதிர்ஷ்டசாலி” என்று தங்களது வாழ்த்துகளையும் கருத்துகளையும் பதிவிட்டு வருகின்றனர்.