2026 சட்டமன்றத் தேர்தலை முன்னிட்டு அதிமுக பொதுச்செயலாளர் எடப்பாடி பழனிசாமி எடுத்து வரும் அதிரடி முடிவுகள் அக்கட்சியின் மூத்த நிர்வாகிகளிடையே பெரும் அதிர்ச்சியை ஏற்படுத்தியுள்ளன. மறைந்த முன்னாள் முதல்வர் ஜெயலலிதாவைப் போன்றே கட்சியின் முழு அதிகாரத்தையும் தன் வசப்படுத்தியுள்ள எடப்பாடி பழனிசாமி, வேட்பாளர் தேர்வில் எவ்வித சமரசமும் செய்து கொள்ளக்கூடாது என்பதில் உறுதியாக இருக்கிறார். குறிப்பாக, முன்னாள் அமைச்சர்கள் மற்றும் மாவட்டச் செயலாளர்கள் பரிந்துரைக்கும் பட்டியலை அப்படியே ஏற்க மறுத்து, தனது நேரடி கண்காணிப்பில் வேட்பாளர்களைத் தேர்வு செய்யும் பணிகளை அவர் முடுக்கிவிட்டுள்ளார்.
வேட்பாளர் தேர்வின் நம்பகத்தன்மையை உறுதி செய்ய, எடப்பாடி பழனிசாமி தனது மகனின் தலைமையில் ஒரு ரகசியக் குழுவை அமைத்துள்ளதாகத் தகவல்கள் தெரிவிக்கின்றன. இக்குழுவில் ஓய்வு பெற்ற உளவுத்துறை அதிகாரிகள் மற்றும் முன்னாள் காவல்துறை உயர் அதிகாரிகள் இடம்பெற்றுள்ளதாகக் கூறப்படுகிறது. இவர்கள் மாநிலம் முழுவதும் தொகுதி வாரியாக ரகசிய ஆய்வு மேற்கொண்டு, மக்களின் ஆதரவு யாருக்கு உள்ளது, யாருக்கு நற்பெயர் இருக்கிறது என்பது குறித்த விரிவான அறிக்கையை தலைமையிடம் அளித்து வருகின்றனர். இந்த அறிக்கையின் அடிப்படையிலேயே வெற்றி வாய்ப்புள்ளவர்களுக்கு மட்டுமே வாய்ப்பு வழங்கப்படும் எனத் தெரிகிறது.
இந்த முறை அதிமுகவில் சுமார் 80 சதவீதம் வரை புதுமுகங்களை வேட்பாளர்களாகக் களமிறக்க எடப்பாடி பழனிசாமி திட்டமிட்டுள்ளதாகத் தெரிகிறது. பணபலத்தை மட்டும் நம்பாமல், மக்கள் மத்தியில் செல்வாக்குள்ள இளைஞர்கள், பட்டதாரிகள் மற்றும் சமூகத்தில் மதிப்பிற்குரியவர்களுக்கு முன்னுரிமை அளிக்க அவர் முடிவு செய்துள்ளார். மேலும், கட்சி இக்கட்டான சூழலில் இருந்தபோது தடம் மாறாமல் உறுதியாக நின்ற விசுவாசிகளுக்கு இத்தேர்தலில் உரிய அங்கீகாரம் வழங்கப்பட வேண்டும் என்பதில் அவர் மிகத் தெளிவாக இருக்கிறார்.
மாவட்டச் செயலாளர்கள் தங்கள் சொந்தத் தொகுதிகளில் மட்டும் கவனம் செலுத்த வேண்டும் என்றும், பிற தொகுதிகளின் வேட்பாளர் தேர்வில் தலையிடக் கூடாது என்றும் கட்சித் தலைமை கண்டிப்புடன் உத்தரவிட்டுள்ளது. இது ஒருபுறம் கட்சியில் புதிய ஒழுக்கத்தை ஏற்படுத்தினாலும், தங்களது வாரிசுகளுக்குச் சீட் கிடைக்கும் என்று எதிர்பார்த்திருந்த மூத்த தலைவர்களுக்குப் பெரும் ஏமாற்றத்தைத் தந்துள்ளது. இத்தகைய அதிரடி மாற்றங்கள் 2026 தேர்தலில் அதிமுகவின் வெற்றி வாய்ப்பை உறுதி செய்யுமா அல்லது உட்கட்சிப் பூசலுக்கு வழிவகுக்குமா என்பதைப் பொறுத்திருந்துதான் பார்க்க வேண்டும்.