அதிமுகவினர் தமிழக வெற்றிக் கழகத்தில் இணைவதற்கு எடப்பாடி பழனிசாமி தான் காரணம் என்று அக்கட்சியின் மாநிலத் துணைப் பொதுச்செயலாளர் ஆதவ் அர்ஜுனா தெரிவித்துள்ளார். முன்னாள் அதிமுக அமைச்சர்கள் தவெகவில் இணைந்த நிகழ்ச்சியில் பேசிய அவர், தவெக என்பது மற்றுமொரு மாற்றுக் கட்சி அல்ல, அதுவே அனைவருக்குமான தாய்க் கட்சி என்று குறிப்பிட்டார். மேலும், மற்ற அரசியல் கட்சிகளில் நிலவுவதைப் போன்ற அதிகாரப் போட்டி எதுவும் தவெகவில் கிடையாது என்றும் அவர் உறுதியளித்தார்.
அதிமுகவின் வாக்குகளைப் பெறாமல் தவெக இந்த வெற்றியைப் பெற்றிருக்க முடியாது என்று சுட்டிக்காட்டிய ஆதவ் அர்ஜுனா, வரும் காலங்களில் 90 சதவீத அதிமுகவினர் தவெகவில் இணைவார்கள் எனக் குறிப்பிட்டார். இந்த இணைப்பு விழா தவெகவின் அரசியல் நகர்வுகளில் ஒரு முக்கிய மைல்கல்லாகப் பார்க்கப்படும் வேளையில், அதிமுகவினர் தவெகவை நோக்கி வருவதற்கு அக்கட்சியின் தற்போதைய தலைமையே வழிவகுத்துள்ளது என்ற அவரது விமர்சனம் அரசியல் வட்டாரத்தில் பெரும் பரபரப்பை ஏற்படுத்தியுள்ளது.