குஜராத் மாநிலம் காந்திநகரைச் சேர்ந்த 26 வயது இளைஞரான பிரியங்க் படேல் என்பவர், வேலை இல்லாத விரக்தியில் தூக்கிட்டு தற்கொலை செய்து கொண்ட அதிர்ச்சிச் சம்பவம் பெரும் சோகத்தை ஏற்படுத்தியுள்ளது. கடந்த மே 27 அன்று தற்கொலை செய்து கொள்வதற்கு முன்பாக, அவர் தனது குடும்பத்தினருக்கு எழுதிய உருக்கமான மற்றும் பதைபதைக்க வைக்கும் கடிதம் ஒன்றை வாட்ஸ்அப்பில் (WhatsApp) அனுப்பிவிட்டு இந்த விபரீத முடிவை எடுத்துள்ளார்.
மென்பொருள் பொறியாளரான (Software Engineer) பிரியங்க், கடந்த சில மாதங்களாக வேலை இல்லாமல் தீவிரமாக வேலை தேடி வந்துள்ளார். பல இடங்களில் முயற்சி செய்தும் வேலை கிடைக்காததால் கடுமையான மன உளைச்சலுக்கு ஆளாகியுள்ளார். தனது தற்கொலைக் கடிதத்தில், “என்னால் வேலை தேட முடியவில்லை, இனி என்னால் வாழ முடியாது” என்றும், “என் மரணத்திற்கு யாரும் காரணமில்லை; நான் என் குடும்பத்திற்கு பாரமாக இருக்க விரும்பவில்லை” என்றும் அவர் தனது இயலாமையைக் குறிப்பிட்டுள்ளார்.
அவர் தனது கடிதத்தில், தனக்கு வழங்கப்பட வேண்டிய எஞ்சிய சம்பள பாக்கியை வாங்குவது எப்படி, வங்கிக் கணக்குகளை எவ்வாறு கையாள்வது போன்ற விவரங்களை தன் குடும்பத்தினருக்குத் துல்லியமாக எழுதியுள்ளார். மேலும், தனது இறுதிச் சடங்குகளை ஆடம்பரம் இல்லாமல் எளிய முறையில் செய்யுமாறும், தன் மரணத்திற்காக யாரும் அழக் கூடாது என்றும் அவர் கேட்டுக்கொண்டுள்ளார். இந்தச் சம்பவம் குறித்து குஜராத் போலீஸார் வழக்குப் பதிவு செய்து தீவிர விசாரணை நடத்தி வருகின்றனர்.