கோவை அரசியல் களம் தற்போது தமிழகத்தின் உற்றுநோக்கப்படும் மையப்புள்ளியாக மாறியுள்ளது. கொங்கு மண்டலத்தை தனது அசைக்க முடியாத கோட்டையாகக் கருதும் அதிமுகவின் வியூகங்களைத் தகர்க்க, முதல்வர் ஸ்டாலின் தனது ‘நம்பிக்கை தளபதி’ செந்தில் பாலாஜியை கோவையில் களமிறக்கியுள்ளார். கரூரிலிருந்து கோவைக்கு மாற்றப்பட்டுள்ள செந்தில் பாலாஜி, மாவட்டத்தில் உள்ள 10 தொகுதிகளையும் கைப்பற்ற வேண்டும் என்ற அசைன்மென்ட்டுடன் அசுர வேகத்தில் செயல்பட்டு வருகிறார். இது அதிமுக பொதுச்செயலாளர் எடப்பாடி பழனிசாமிக்கு ஒருவித கலக்கத்தை ஏற்படுத்தியுள்ள நிலையில், கோவையைத் தக்கவைக்க அவர் வகுக்கும் அதிரடித் திட்டங்கள் அதிமுக வட்டாரத்தில் பெரும் பரபரப்பை ஏற்படுத்தியுள்ளது.
சமீபத்தில் முன்னாள் அமைச்சர் எஸ்.பி.வேலுமணியுடன் நீண்ட நேரம் ஆலோசனையில் ஈடுபட்ட எடப்பாடி பழனிசாமி, செந்தில் பாலாஜியின் செயல்பாடுகள் மற்றும் கள நிலவரம் குறித்து விரிவாகக் கேட்டறிந்துள்ளார். அப்போது பேசிய வேலுமணி, செந்தில் பாலாஜியின் அரசியல் பாணிகளைத் தான் நன்கு அறிவதாகவும், எத்தகைய சவால்கள் வந்தாலும் கோவையை அதிமுகவின் கோட்டையாக மீண்டும் நிலைநிறுத்துவேன் என்றும் அவருக்குத் தைரியம் அளித்துள்ளார். “அவர் வகுக்கும் திட்டங்களை முறியடிக்க என்னிடம் ரகசிய வியூகங்கள் உள்ளன; நீங்கள் கவலைப்படாமல் பிரச்சாரத்தில் கவனம் செலுத்துங்கள்” என எடப்பாடியைத் தெம்பூட்டியதாகத் தகவல்கள் கசிகின்றன.
இருப்பினும், எடப்பாடியிடம் காட்டிய அதே தன்னம்பிக்கையை நிர்வாகிகளிடம் பேசும்போது வேலுமணி வெளிப்படுத்தவில்லை எனத் தெரிகிறது. “தலைவரிடம் தைரியமாகச் சொல்லிவிட்டேன், ஆனால் கள நிலவரம் சவாலாக உள்ளது; நாம் ஒரு அடி முன்னே வைத்தால், திமுக எட்டு அடி முன்னால் நிற்கிறது” எனத் தொண்டர்களிடம் எதார்த்தத்தைப் பேசிய வேலுமணி, செந்தில் பாலாஜியை வீழ்த்த இன்னும் தீவிரமாக உழைக்க வேண்டும் என உத்தரவிட்டுள்ளார். திமுகவின் அசுர வேகப் பிரச்சாரமும், செந்தில் பாலாஜியின் நுணுக்கமான தேர்தல் பணிகளும் அதிமுக மேலிடத்தை சற்றே திகைக்க வைத்துள்ளது என்பதுதான் தற்போதைய நிதர்சனம்.
மறுபுறம், கொங்கு மண்டலத்தில் செந்தில் பாலாஜியின் பரிந்துரையின் பேரில் வேட்பாளர்கள் அறிவிக்கப்பட்டிருப்பது, திமுகவின் பாரம்பரிய நிர்வாகிகளிடையே சில அதிருப்திகளை உருவாக்கியுள்ளதாகக் கூறப்படுகிறது. இந்த வாய்ப்பைப் பயன்படுத்திக் கொள்ளத் துடிக்கும் எஸ்.பி.வேலுமணி, அதிருப்தியில் உள்ள திமுகவினரைத் தன் பக்கம் இழுக்க ‘மெகா பட்ஜெட்’ திட்டங்களை வகுத்து வருவதாகப் பேசப்படுகிறது. கோவை தெற்கு முதல் ஒட்டுமொத்த மாவட்டம் வரை, “அவரா? நானா?” என்ற தனிப்பட்ட கௌரவப் போராட்டமாக மாறியுள்ள இந்த அரசியல் போர், வரும் தேர்தலில் மிகப்பெரிய திருப்புமுனையை ஏற்படுத்தும் என எதிர்பார்க்கப்படுகிறது.