2026 தமிழகச் சட்டமன்றத் தேர்தலை முன்னிட்டு, ஆளும் திமுக அரசு தனது தேர்தல் வியூகங்களை அதிரடியாக வகுக்கத் தொடங்கியுள்ளது. குறிப்பாக, ‘திராவிட மாடல் 2.0’ என்ற பெயரில் மக்களின் வங்கிக் கணக்குகளுக்கு நேரடியாகப் பணத்தைச் சென்றடையச் செய்யும் நிதிசார்ந்த திட்டங்களை முன்னிறுத்தி, வெற்றியை உறுதி செய்ய முதல்வர் மு.க. ஸ்டாலின் திட்டமிட்டுள்ளார். மேடைப் பேச்சுகளைத் தாண்டி, சாமானிய மக்களின் வாழ்வாதாரத்தில் நேரடியாகத் தாக்கத்தை ஏற்படுத்தும் இந்த நடவடிக்கைகள் அரசியல் களத்தில் பெரும் விவாதத்தைக் கிளப்பியுள்ளன.
இந்த நிதிசார்ந்த போர்த் திட்டத்தின் முக்கிய அங்கமாக, கலைஞர் மகளிர் உரிமைத் தொகைத் திட்டத்தின் கீழ் அண்மையில் 1.31 கோடி பயனாளிகளுக்கு கோடைகால சிறப்புத் தொகையுடன் சேர்த்து தலா 5,000 ரூபாய் வழங்கப்பட்டுள்ளது. மேலும், அடுத்த முறை ஆட்சிக்கு வந்தவுடன் இந்தத் தொகை மாதம் 2,000 ரூபாயாக உயர்த்தப்படும் என்ற அதிரடி அறிவிப்பும் வெளியாகியுள்ளது. ஏற்கெனவே வழங்கப்பட்ட 3,000 ரூபாய் பொங்கல் பரிசு மற்றும் தற்போது வழங்கப்பட்டுள்ள நிதி உதவிகள் வாக்காளர்கள் மத்தியில் திமுகவின் செல்வாக்கை பலப்படுத்தியுள்ளன.
திமுகவின் இந்த வெற்றிப் பயணத்தில் ‘இடைக்கால பட்ஜெட்’ மற்றும் ‘தேர்தல் அறிக்கை’ ஆகிய இரண்டும் மிக முக்கிய ஆயுதங்களாகப் பார்க்கப்படுகின்றன. பிப்ரவரி 17 அன்று தாக்கல் செய்யப்படவுள்ள இடைக்கால பட்ஜெட்டில் பொதுமக்களைக் கவரும் வகையிலான புதிய உட்கட்டமைப்பு திட்டங்களும் மானியங்களும் இடம்பெறலாம் என எதிர்பார்க்கப்படுகிறது. அதேபோல், கனிமொழி எம்.பி தலைமையிலான குழு தயாரித்து வரும் தேர்தல் அறிக்கை, எதிர்தரப்பினரால் முறியடிக்க முடியாத அளவுக்குப் பிரம்மாண்டமான வாக்குறுதிகளைக் கொண்டிருக்கும் எனக் கூறப்படுகிறது.
எதிர்க்கட்சிகளான அதிமுக மற்றும் தமிழக வெற்றிக் கழகம் போன்றவை இத்தகைய அறிவிப்புகளை “தேர்தல் கால நாடகம்” என்று விமர்சித்தாலும், கள நிலவரம் திமுகவிற்குச் சாதகமாகவே இருப்பதாக அரசியல் நோக்கர்கள் கருதுகின்றனர். மக்களின் அன்றாடத் தேவைகளைப் பூர்த்தி செய்யும் வகையில் நேரடியாக நிதி உதவிகளைச் செய்துவிட்டு, அதன் பிறகு கவர்ச்சிகரமான தேர்தல் அறிக்கையை முன்வைப்பதன் மூலம் 2026 தேர்தலை ஒரு ‘கேக் வாக்’ (Cake Walk) போல எளிதாக வெல்ல திமுக காய் நகர்த்தி வருகிறது.