தமிழக சட்டமன்றத் தேர்தலுக்குப் பிந்தைய அரசியல் களம் முன் எப்போதும் இல்லாத அளவிற்குப் பெரும் மாற்றங்களைக் கண்டுள்ளது. தமிழக வெற்றிக் கழகம் (தவெக) ஆட்சியைப் பிடித்துள்ள நிலையில், ஆளுங்கட்சியாக இருந்த திமுக எதிர்க்கட்சியாக மாறியுள்ளது. தமிழகத்தை நீண்ட காலம் ஆட்சி செய்த அதிமுக மூன்றாம் இடத்திற்குத் தள்ளப்பட்டுள்ளது. இந்த அதிரடி அரசியல் சூழலில், பாஜகவிலிருந்து வெளியேறிய அண்ணாமலை, ‘வீ தி லீடர்ஸ்’ (We the Leaders) என்ற புதிய அரசியல் இயக்கத்தைத் தொடங்கி தமிழக அரசியலில் புதிய அத்தியாயத்தை ஆரம்பித்துள்ளார்.
இந்த இயக்கம் தொடங்கப்பட்ட வெறும் மூன்று நாட்களில் 17 லட்சம் உறுப்பினர்களை நெருங்கிப் பெரும் வரவேற்பைப் பெற்றுள்ளது. இது குறித்து எக்ஸ் (X) தளத்தில் பதிவிட்டுள்ள அண்ணாமலை, இந்த அசுர வளர்ச்சி ஒரு சிறு தொடக்கம் மட்டுமே என்றும், தமிழகத்தில் நிச்சயம் ஒரு நேர்மறையான அரசியல் மாற்றத்தை உருவாக்குவோம் என்றும் தொண்டர்களுக்குத் தனது நன்றியையும் வாழ்த்துகளையும் தெரிவித்துள்ளார்.
அதே வேளையில், இயக்கத்தின் பதவிகள் குறித்து அவர் ஒரு முக்கிய விளக்கத்தை அளித்துள்ளார். தற்போதைய சூழலில் தனக்கு உட்பட யாருக்கும் எந்தவிதப் பொறுப்புகளோ அல்லது பதவிகளோ வழங்கப்படவில்லை என்றும், தகுதியானவர்கள் தேர்ந்தெடுக்கப்பட்டு விரைவில் பொறுப்புகள் வழங்கப்படும் என்றும் கூறியுள்ளார். மேலும், தங்களின் இயக்கத்தில் ‘நிரந்தரப் பதவி’ என்ற பேச்சுக்கே இடமில்லை என்பதைத் தெளிவுபடுத்திய அவர், இந்த முதல் ஒரு மாத காலம் முழுமையாக உறுப்பினர் சேர்க்கையில் மட்டுமே கவனம் செலுத்தப்படும் என்று குறிப்பிட்டுள்ளார்.
இதனிடையே, தனது பெயரையும் புகைப்படத்தையும் பயன்படுத்திச் சிலர் மாவட்ட வாரியாகப் பொறுப்புகளை அறிவித்து புதிய அமைப்புகளைத் தொடங்கி வருவதற்குக் கடும் கண்டனம் தெரிவித்துள்ளார். அண்ணாமலை அன்புக் கூட்டம், நற்பணி மன்றம், மக்கள் இயக்கம் போன்ற பெயர்களில் செயல்படும் அமைப்புகள் உடனடியாகத் தனது பெயரையோ, புகைப்படங்களையோ பயன்படுத்துவதை நிறுத்திக் கொள்ள வேண்டும் என்று பணிவுடன் கேட்டுக்கொண்டுள்ளார். தங்களின் அதிகாரப்பூர்வ இயக்கத்தில் இணைய விரும்புபவர்கள் wetheleader.org என்ற இணையதளம் மூலமாக மட்டுமே தங்களை இணைத்துக் கொள்ள வேண்டும் என்றும் அவர் அறிவுறுத்தியுள்ளார்.