கடந்த 2025ஆம் ஆண்டு ராஜஸ்தான் ராயல்ஸ் அணிக்குள் நிலவிய சில உள்ளரசியல் மற்றும் அதிருப்தி காரணமாக, சஞ்சு சாம்சன் டிரேடிங் முறையில் சென்னை சூப்பர் கிங்ஸ் அணியில் இணைந்தார். ரவீந்திர ஜடேஜா போன்ற ஒரு மிக முக்கிய வீரரை விட்டுக்கொடுத்து, சுமார் 18 கோடி ரூபாய் செலவழித்து சிஎஸ்கே அவரை வாங்கியது. சிஎஸ்கேவில் இணைந்தது முதலே கேப்டன் பதவியை சாம்சன் எதிர்பார்த்து வந்த நிலையில், நிர்வாகம் அதற்கு உடனடியாக செவிசாய்க்கவில்லை. தற்போது 2027 ஐபிஎல் தொடருக்காகவாவது தன்னை கேப்டனாக்க வேண்டும் என அவர் கோரியும், சிஎஸ்கே தரப்பில் இருந்து தெளிவான பதில் கிடைக்காததால் அவர் கடும் அதிருப்தியில் உள்ளதாக தகவல்கள் வெளியாகியுள்ளன.
இந்த கேப்டன்சி சிக்கலுக்கு முக்கியக் காரணம் தற்போதைய கேப்டன் ருதுராஜ் கெய்க்வாட் தான் என கூறப்படுகிறது. எந்தவொரு பெரிய வீரர் அணிக்கு வந்தாலும், தானே தொடர்ந்து கேப்டனாக நீடிப்பேன் என்றும், தனக்கு வலுவான அணியை அமைத்துக் கொடுத்தால் கோப்பையை வென்று காட்டுவேன் என்றும் ருதுராஜ் உறுதியாக உள்ளார். மறுபுறம், ராஜஸ்தானில் கேப்டனாக வலம் வந்த தனக்கு இங்கு சாதாரண வீரராக ஆடுவது கௌரவப் பிரச்சனையாகவும், இந்திய டி20 அணியில் தனது இடத்தை மீண்டும் உறுதி செய்ய ஒரு அணியின் கேப்டனாக இருப்பது அவசியம் எனவும் சஞ்சு சாம்சன் கருதுகிறார். இதனால்தான் நிர்வாகத்தால் சாம்சனுக்கு எந்த வாக்குறுதியும் அளிக்க முடியவில்லை.
தனது கோரிக்கை நிறைவேறாத பட்சத்தில், மீண்டும் டிரேடிங் மூலம் வேறு அணிக்குச் செல்ல சஞ்சு சாம்சன் விரும்புவதாகவும், அவரை வளைத்துப் போட்டு கேப்டனாக்க கொல்கத்தா மற்றும் லக்னோ அணிகள் வலைவிரித்து காத்திருப்பதாகவும் செய்திகள் உலா வருகின்றன. இருப்பினும், பெரும் விலை கொடுத்து வாங்கிய சாம்சனை அவ்வளவு எளிதில் விட்டுக்கொடுக்க சிஎஸ்கே விரும்பவில்லை. இதுவரை இந்த விவகாரங்கள் குறித்து எந்த அதிகாரப்பூர்வ அறிவிப்பும் வெளியாகவில்லை; விரைவில் புதிய தலைமைப் பயிற்சியாளரை நியமித்த பின்னரே, சஞ்சு சாம்சனை சமாதானப்படுத்தி அணியில் தக்கவைப்பதற்கான அடுத்தக்கட்ட நடவடிக்கைகளை சிஎஸ்கே நிர்வாகம் எடுக்கும் என எதிர்பார்க்கப்படுகிறது.