மனைவியை காரில் வைத்து கணவன் எரித்த சம்பவம் அதிர்ச்சியை ஏற்படுத்தியுள்ளது. சம்பவத்தன்று நள்ளிரவு 2 மணிக்குத் தனது மனைவி சீமாவுடன் மருத்துவர் நிலேஷ் மருத்துவமனைக்குச் புறப்பட்டார். அவர்களுடன் நிலேஷின் வாடகைதாரர்களான சுபம் மற்றும் ராமகிருஷ்ணா ஆகிய இருவரும் உடன் சென்றனர். பயணத்தின் போது முதலில் ஒரு சிறிய விபத்து ஏற்பட்டது, அதன் பிறகு சிறிது நேரத்திலேயே காரில் தீப்பிடித்துவிட்டதாகத் தனது மாமனாருக்கு நிலேஷ் தொலைபேசி மூலம் தகவல் தெரிவித்துள்ளார். ஆனால், சம்பவ இடத்திற்கு மீட்புக் குழுவினர் வருவதற்குள் மருத்துவர் நிலேஷ் மற்றும் அவரது வாடகைதாரர்கள் இருவரும் பத்திரமாக காரில் இருந்து வெளியேறிவிட்டனர்; ஆனால் துரதிர்ஷ்டவசமாக சீமா மட்டும் காரின் உள்ளேயே தீயில் கருகி பரிதாபமாக உயிரிழந்தார். முழு வளர்ச்சி அடைந்த மூன்று ஆண்களால் தங்களைக் காப்பாற்றிக் கொள்ள முடிந்தபோது, மயக்க நிலையில் இருந்த ஒரே ஒரு பெண்ணைக் காப்பாற்றி காரில் இருந்து வெளியே எடுக்க முடியவில்லை என்பது காவல்துறையினருக்குப் பெரும் சந்தேகத்தை ஏற்படுத்தியது.
தொடர்ந்து நடத்தப்பட்ட அறிவியல் பூர்வ விசாரணையில், காரின் சிஎன்ஜி சிலிண்டர் எவ்வித பாதிப்பும் இன்றி அப்படியே இருப்பதும், மாறாகச் சம்பவ இடத்தில் எரிக்கப்பட்ட தீக்குச்சி மற்றும் ஒரு பெட்ரோல் கேன் இருப்பதும் கண்டறியப்பட்டது. இதையடுத்து காவல்துறையினர் மூவரிடமும் தனித்தனியாக நடத்திய தீவிர விசாரணையில் அவர்களின் வாக்குமூலங்கள் முன்னுக்குப் பின் முரணாக இருந்தன. இறுதியில் போலீசாரின் கிடுக்கிப்பிடி விசாரணையில், அந்த இரு வாடகைதாரர்களும் ஒப்புக்கொண்ட கொடூரமான உண்மை அனைவரையும் அதிர்ச்சியில் ஆழ்த்தியது. அது விபத்தோ அல்லது தற்செயலான தீ விபத்தோ அல்ல, மாறாக மருத்துவர் நிலேஷ் திட்டமிட்டுத் தனது மனைவியைக் காரோடு சேர்த்து பெட்ரோல் ஊற்றி எரித்துக் கொன்ற ஒரு கொடூரமான கொலைச் சதி என்பது அம்பலமானது.