வயிற்றில் வளர்ந்த குழந்தைக்கே டிஎன்ஏ சோதனையா?… வளைகாப்பு வீட்டில் நடந்த நெஞ்சை உலுக்கும் பயங்கரம்… 5 மாத கர்ப்பிணியின் விபரீத முடிவு…!

ஹைதராபாத்தில் கணவன் மற்றும் மாமியாரின் தொடர் மன உளைச்சலாலும், வயிற்றில் வளரும் குழந்தைக்கு டிஎன்ஏ (DNA) பரிசோதனை செய்ய வேண்டும் என்ற கொடூரமான சந்தேகத்தாலும், 23 வயதான சுஷ்மிதா என்ற ஐந்து மாத கர்ப்பிணிப் பெண் அவமானம் தாங்காமல் தற்கொலை செய்து கொண்ட சம்பவம் பெரும் அதிர்ச்சியை ஏற்படுத்தியுள்ளது. ஜூன் 25 ஆம் தேதி மேடக் மாவட்டம், கடிபெத்தபூர் கிராமத்தில் உள்ள தனது இல்லத்தில் சுஷ்மிதா சடலமாக மீட்கப்பட்டார். இந்தத் துயரச் சம்பவத்தையடுத்து, தற்கொலைக்குத் தூண்டியதாக சுஷ்மிதாவின் கணவர் அபிலாஷ் மற்றும் அவரது தாயார் லட்சுமி ஆகிய இருவரையும் அல்லாதுர்க் காவல்துறையினர் கைது செய்து நீதிமன்றக் காவலில் அடைத்துள்ளனர்.

வளையல் வியாபாரியான அபிலாஷுக்கும் சுஷ்மிதாவிற்கும் திருமணமாகி 18 மாதங்களே ஆன நிலையில், ஆரம்பத்திலிருந்தே சுஷ்மிதா உடல் ரீதியாகவும் மன ரீதியாகவும் கடுமையான வரதட்சணை மற்றும் குடும்பத் துன்புறுத்தல்களுக்கு ஆளாக்கப்பட்டு வந்ததாகக் கூறப்படுகிறது. இந்நிலையில், ஜூன் 23 அன்று சுஷ்மிதாவின் வளைகாப்பு விழா ஏற்பாடுகள் குறித்துப் பேசுவதற்காக அவரது பெற்றோர் மகளின் வீட்டிற்குச் சென்றுள்ளனர். அப்போது, குடும்பத்தினர் மற்றும் பெரியவர்கள் முன்னிலையில் வளைகாப்பு விழாவை நிராகரித்த அபிலாஷ், சுஷ்மிதாவின் வயிற்றில் வளரும் குழந்தைக்கு டிஎன்ஏ பரிசோதனை செய்ய வேண்டும் என்று கூறி அநாகரிகமாக வாக்குவாதத்தில் ஈடுபட்டுள்ளார்.

பெரியவர்கள் முன்னிலையில் தன் கற்பின் மீது சுமத்தப்பட்ட இந்த அபாண்டமான பழியும், கணவனின் கொடூரமான சந்தேகமும் சுஷ்மிதாவை ஆழமான மன அதிர்ச்சிக்கும் அவமானத்திற்கும் உள்ளாக்கியுள்ளது. இந்தத் தீவிர மன உளைச்சலைத் தாங்க முடியாமல், அவர் தனது வாழ்வை முடித்துக் கொள்ளும் விபரீத முடிவை எடுத்துள்ளார். தற்போது பிரேதப் பரிசோதனைக்குப் பிறகு சுஷ்மிதாவின் உடல் பெற்றோரிடம் ஒப்படைக்கப்பட்டுள்ள நிலையில், ஒரு பெண்ணின் உயிரையும் அவளது வயிற்றில் வளர்ந்த பச்சைக் குழந்தையையும் பலி வாங்கிய குற்றவாளிகளுக்குக் கடுமையான தண்டனை வழங்கப்பட வேண்டும் என்று அவளது குடும்பத்தினர் கண்ணீருடன் கோரிக்கை விடுத்துள்ளனர்.