தமிழக அரசியலில் 2026 சட்டமன்றத் தேர்தலுக்கான களம் இப்போதே சூடுபிடிக்கத் தொடங்கியுள்ளது. குறிப்பாக, வரும் தேர்தலில் 200 தொகுதிகளில் வெற்றி பெற்று தனிப்பெரும்பான்மையுடன் ஆட்சி அமைக்க வேண்டும் என்ற திமுகவின் இலக்கிற்கு, நடிகர் விஜய்யின் தமிழக வெற்றிக் கழகம் பெரும் சவாலாக உருவெடுத்துள்ளதாக அரசியல் வட்டாரங்களில் பேசப்படுகிறது. திமுக மேற்கொண்ட ரகசிய கள ஆய்வில், விஜய்யின் வருகை அக்கட்சியின் வாக்கு வங்கியில் குறிப்பிடத்தக்க மாற்றங்களை ஏற்படுத்தும் என்ற அதிர்ச்சித் தகவல் வெளியாகியுள்ளதாகத் தெரிகிறது.
இந்த ரகசிய அறிக்கையின்படி, திமுகவின் பாரம்பரிய வாக்கு வங்கியான சிறுபான்மையினர் வாக்குகள் இந்த முறை தவெக பக்கம் சாய வாய்ப்புள்ளதாகக் கூறப்படுகிறது. விஜய் ஒரு கிறிஸ்தவர் என்பதும், இளைஞர்கள் மற்றும் நடுநிலை வாக்காளர்கள் மத்தியில் அவருக்கு இருக்கும் செல்வாக்கும் திமுகவுக்கு பின்னடைவை ஏற்படுத்தலாம் எனக் கணிக்கப்பட்டுள்ளது. பல பகுதிகளில் சிறுபான்மையினரின் ஆதரவு விஜய்க்கு சாதகமாகத் திரும்புவது, திமுகவின் 200 தொகுதி கனவைச் சிதைக்கக்கூடும் என்ற அச்சத்தை அக்கட்சி மேலிடத்திற்கு ஏற்படுத்தியுள்ளது.
மற்றொருபுறம், திமுக கூட்டணியில் உள்ள காங்கிரஸ் கட்சி 80-க்கும் மேற்பட்ட தொகுதிகளையும், ஆட்சியில் பங்கையும் கேட்டு அழுத்தம் கொடுத்து வருகிறது. ஆனால், அதிக இடங்களை ஒதுக்கினால் எதிர்காலத்தில் சிக்கல் ஏற்படும் என திமுக தயங்குகிறது. இந்தச் சூழலைச் சாதகமாகப் பயன்படுத்திக் கொள்ளும் வகையில், காங்கிரஸ் கட்சியுடன் கூட்டணி அமைக்க விஜய் ஆர்வம் காட்டி வருவதாகவும், இதற்காக ராகுல் காந்தி உள்ளிட்ட முக்கியத் தலைவர்களுடன் அவர் தொடர்பில் இருப்பதாகவும் தகவல்கள் கசிந்துள்ளன.
இவ்வாறு தவெக மற்றும் காங்கிரஸ் இடையேயான நெருக்கம் ஒருபுறம், சிறுபான்மையினர் வாக்குகள் சரிவு மறுபுறம் என திமுக ‘டபுள் சேலஞ்ச்’ நிலையை எதிர்கொண்டுள்ளது. விஜய்யின் அரசியல் நகர்வுகள் திமுகவின் தேர்தல் வியூகங்களைத் தடம் புரளச் செய்ய வாய்ப்புள்ளதால், தவெக செல்வாக்குள்ள தொகுதிகளைக் கண்டறிந்து அங்கு கூடுதல் கவனம் செலுத்தவும், புதிய வியூகங்களை வகுக்கவும் திமுக திட்டமிட்டு வருகிறது. தமிழக அரசியல் களம் வரும் நாட்களில் இன்னும் பல திருப்பங்களைச் சந்திக்கும் என எதிர்பார்க்கப்படுகிறது.