தமிழ்நாட்டின் சட்டசபையில் இந்து சமய அறநிலையத்துறை மானியக் கோரிக்கை மீதான விவாதத்தின் போது, ஆளுங்கட்சி மற்றும் எதிர்க்கட்சி உறுப்பினர்களுக்கு இடையே கடுமையான காரசார விவாதம் நடைபெற்றது. துறை சார்ந்த சாதனைகளையும் எதிர்காலத் திட்டங்களையும் முன்வைத்து பேசிய அமைச்சர் ரமேஷ், 100 நாட்களில் ரூ.108 கோடி வருவாயைப் பெருக்கியுள்ளதாகவும், கோயில்களுக்குச் சொந்தமான 464 ஏக்கர் நிலத்தை மீட்க மேல்முறையீடு செய்யப்பட்டுள்ளதாகவும் பட்டியலிட்டார். மேலும், சிவன் சொத்து குல நாசம் என்ற பழமொழியின் தீவிரத்தை தாம் உணர்ந்துள்ளதாகக் குறிப்பிட்ட அமைச்சர், முந்தைய திமுக ஆட்சியில் 2,494 கோயில்களின் திருப்பணிகளுக்காகத் திட்டமிட்டதில் 392 கோடி ரூபாய் நிலுவையில் உள்ளதால் பல பணிகள் பாதியிலேயே நின்றுபோயுள்ளதாகக் குற்றம்சாட்டினார்.
அமைச்சர் ரமேஷ் தனது உரையின் தொடர்ச்சியாக, கடந்த திமுக ஆட்சிக் காலத்தில் அறநிலையத்துறையில் நடந்த முறைகேடுகள் அனைத்தையும் ஆதாரத்துடன் சேகரித்து வைத்துள்ளதாகவும், அவற்றை மிக விரைவில் பொதுவெளியில் ஆதாரத்துடன் வெளியிடப் போவதாகவும் தெரிவித்து சட்டசபையில் பரபரப்பைக் கூட்டினார். இந்த குற்றச்சாட்டுகளும், “ஆதாரங்களை வெளியிடுவோம்” என்ற எச்சரிக்கையும் சட்டசபையில் பெரும் சலசலப்பை ஏற்படுத்தியது.
அமைச்சரின் இந்த குற்றச்சாட்டுக்கு உடனடியாக பதிலளித்துப் பேசிய முன்னாள் அமைச்சரும் திமுக எம்.எல்.ஏ-வுமான சேகர்பாபு, “இந்த பூச்சாண்டிக்கு எல்லாம் பயப்படுகின்ற இயக்கம் திராவிட முன்னேற்றக் கழகம் அல்ல” என அதிரடியாக சவால் விடுத்தார். தாம் 50 ஆண்டுகளாக ஆன்மிக பயணத்தில் இருப்பவன் என்றும், சிவன் சொத்து குல நாசம் எனும் பழமொழியை முழுமையாக நம்புபவன் என்றும் குறிப்பிட்ட அவர், ஏற்கனவே தங்கள் ஆட்சிக்கு எதிராக ஏழு முக்கியக் கோயில்களில் தணிக்கை செய்தும் எவ்வித முறைகேடும் கண்டுபிடிக்கப்படவில்லை என்பதை நினைவு கூர்ந்தார். மேலும், ஆதாரத்துடன் எந்தவொரு குற்றச்சாட்டை நிரூபித்தாலும் அதை முழுமையாக ஏற்றுக்கொள்ளவும், சட்டத்தின் படிக்கட்டுகளில் ஏறி எதிர்கொள்ளவும் தயார் எனத் தெரிவித்தார்.
தொடர்ந்து பேசிய சேகர்பாபு, ஓர் ஆட்சி நிறைவுற்று அடுத்த ஆட்சி அமையும் போது முந்தைய ஆட்சியில் தொடங்கப்பட்ட நிலுவைப் பணிகளைத் தொடர்ந்து செயல்படுத்துவதே திறமையான ஆட்சிக்கு அடையாளம் என்று சுட்டிக்காட்டினார். கொள்கை விளக்கக் குறிப்பில் 3,000 கோயில்களுக்கு குடமுழுக்கு நடத்தப்படும் என தவெக அரசு அறிவித்துள்ளதை சுட்டிக்காட்டிய அவர், திமுக ஆட்சியில் மொத்தம் 4,930 கோயில்களுக்கு குடமுழுக்கு செய்யப்பட்டது என்றும், எனவே இந்த எண்ணிக்கை குறைவு குறித்து அரசு தெளிவான விளக்கம் அளிக்க வேண்டும் என்றும் கேட்டுக்கொண்டார்.