தமிழகத்தில் 2026 தேர்தல் நெருங்கிக் கொண்டிருக்கும் சூழலில் அனைத்து அரசியல் கட்சிகளும் தீவிரமாக தேர்தல் பணியில் ஈடுபட்டு வருகின்றன. குறிப்பாக விஜயின் அரசியல் நகர்வு உன்னிப்பாக கவனிக்கப்பட்டு வருகிறது. திமுகவுக்கு தற்போது பெரும் போட்டியாக விஜயின் தமிழக வெற்றிக்கழகம் கட்சி மாறியுள்ளது. விஜய்க்கு மேலும் பலத்தை கூட்டும் வகையில் 50 ஆண்டுகால அரசியல் அனுபவம் வாய்ந்த செங்கோட்டையன் சமீபத்தில் விஜய் கட்சியில் இணைந்தார். இன்னும் சில அமைச்சர்களை கட்சியில் சேர்க்கும் பணியில் தீவிரம் காட்டி வருகின்றார்.
தமிழக வெற்றி கழகம் கட்சிக்கு பலம் கூடிக்கொண்டே செல்லும் நிலையில் விஜய்க்கு அதிர்ச்சி கொடுக்கும் விதமாக கலப்பை மக்கள் இயக்க தலைவரும் தமிழக வெற்றி கழகம் தலைவர் விஜயின் முன்னாள் மேலாளர் மற்றும் இயக்குனரான பி.டி செல்வகுமார் தனது ஆதரவாளர்கள் 40 பேருடன் திமுகவில் முதல்வர் ஸ்டாலின் முன்னிலையில் இன்று இணைந்தார். சென்னை அண்ணா அறிவாலயத்தில் ஏற்பாடு செய்யப்பட்ட இணைப்பு நிகழ்ச்சியில் செல்வகுமார் உள்ளிட்ட நிர்வாகிகளை முதல்வர் கட்சித் துண்டு அணிவித்து வரவேற்றார். கடந்த சில நாட்களாகவே முக்கிய நிர்வாகிகள் விஜய் கட்சி இணைந்து வரும் நிலையில் தற்போது 40 பேருடன் இவர் திமுகவில் இணைந்தது பெரும் அதிர்ச்சியை ஏற்படுத்தியுள்ளது.