தமிழக அரசியலில் தேர்தல் களம் சூடுபிடித்துள்ள நிலையில், ஆளும் திமுக மற்றும் அதன் முக்கிய கூட்டணிக் கட்சியான காங்கிரஸ் இடையே தொகுதிப் பங்கீட்டில் கடும் இழுபறி நீடித்து வருகிறது. அண்மையில் நடைபெற்ற பேச்சுவார்த்தையில், திமுக தலைமை காங்கிரஸிற்கு வெறும் 21 தொகுதிகளை மட்டுமே ஒதுக்க முன்வந்துள்ளதாகத் தகவல்கள் வெளியாகியுள்ளன. இது காங்கிரஸ் நிர்வாகிகள் மற்றும் தொண்டர்களிடையே கடும் அதிர்ச்சியையும் அதிருப்தியையும் ஏற்படுத்தியுள்ளது.
இந்தத் தொகுதிப் பங்கீடு மோதலுக்குப் பின்னால் பல்வேறு அரசியல் காரணங்கள் அடுக்கப்படுகின்றன. குறிப்பாக, காங்கிரஸ் கட்சியின் இரண்டாம் கட்டத் தலைவர்கள் சிலர் திமுகவை பொதுவெளியில் விமர்சித்தது முதல்வர் மு.க.ஸ்டாலினுக்கு கடும் கோபத்தை ஏற்படுத்தியதாகக் கூறப்படுகிறது. மேலும், தமிழக வெற்றிக் கழகத்தின் வருகையைச் சுட்டிக்காட்டி காங்கிரஸார் திமுகவை மறைமுகமாக நெருக்கடிக்குள்ளாக்க முயன்றதும், திமுகவின் இந்த அதிரடி முடிவுக்கு முக்கியக் காரணமாகப் பார்க்கப்படுகிறது.
காங்கிரஸ் தரப்பில் 40-க்கும் மேற்பட்ட தொகுதிகள் மற்றும் ஒரு ராஜ்யசபா சீட் கோரப்பட்ட நிலையில், திமுக தரப்பு 21 இடங்களுக்கு மேல் ஒரு இடம் கூட தர முடியாது என்பதில் கறாராக உள்ளது. கூட்டணியில் தேமுதிக இணைந்துள்ளதைக் காரணம் காட்டி, மற்ற கூட்டணிக் கட்சிகளுக்கும் இடங்களை ஒதுக்க வேண்டிய கட்டாயம் இருப்பதாக திமுக தரப்பு விளக்கியுள்ளது. “விருப்பமிருந்தால் கூட்டணியில் தொடரலாம், இல்லையெனில் வெளியேறலாம்” என்ற ரீதியிலான திமுகவின் இந்தத் தற்காப்பு அணுகுமுறை அரசியல் வட்டாரத்தில் பெரும் பரபரப்பை ஏற்படுத்தியுள்ளது.
தற்போதைய சூழலில், திமுகவின் இந்த நிபந்தனையை ஏற்றுக்கொண்டு காங்கிரஸ் கூட்டணியில் நீடிக்குமா அல்லது மாற்றுப் பாதையைத் தேடிச் செல்லுமா என்ற கேள்வி எழுந்துள்ளது. ஆட்சியில் பங்கு, கூடுதல் இடங்கள் என அடம்பிடித்த காங்கிரஸிற்கு, திமுகவின் இந்த ’21 இடங்கள்’ என்ற சலுகை பெரும் சவாலாக அமைந்துள்ளது. அடுத்த சில நாட்களில் காங்கிரஸ் எடுக்கப்போகும் முடிவுதான் தமிழகக் கூட்டணி அரசியலின் அடுத்தக் கட்டத்தைத் தீர்மானிக்கும் என எதிர்பார்க்கப்படுகிறது.