தமிழக சட்டசபை தேர்தல் நெருங்கி வரும் வேளையில், ஆளுங்கட்சியான திமுக தனது கூட்டணியை வலுப்படுத்தும் நோக்கில் அதிரடி நடவடிக்கைகளை எடுத்து வருகிறது. தேமுதிக மற்றும் ஓ.பன்னீர்செல்வம் ஆகியோரின் ஆதரவைத் தொடர்ந்து, தற்போது பாமக நிறுவனர் ராமதாஸையும் தங்கள் பக்கம் இழுக்க திமுக தலைமை தீவிர முயற்சிகளை மேற்கொண்டு வருகிறது. நடிகர் விஜய்யின் தமிழக வெற்றிக் கழகத்தின் வருகை மற்றும் நான்கு முனைப் போட்டி நிலவும் சூழலில், ஒவ்வொரு வாக்கு வங்கியும் முக்கியம் என்பதால் முதல்வர் ஸ்டாலின் இந்த ‘பக்கா ஸ்கெட்ச்’ போட்டுள்ளதாக அரசியல் வட்டாரங்கள் தெரிவிக்கின்றன.
முன்னாள் முதல்வர் ஓ.பன்னீர்செல்வம் சமீபத்தில் முதல்வர் ஸ்டாலினை நேரில் சந்தித்துப் பேசியதும், அவரது ஆதரவு எம்.எல்.ஏ ஐயப்பன் சட்டசபையிலேயே ஸ்டாலினுக்கு ஆதரவாகப் பேசியதும் அரசியல் களத்தில் பெரும் பரபரப்பை ஏற்படுத்தியது. “மீண்டும் திமுக ஆட்சிக்கு வர வாய்ப்புள்ளது” என ஓபிஎஸ் வெளிப்படையாகப் பாராட்டியது, அவர் திமுக கூட்டணிக்கு வருவது ஏறக்குறைய உறுதி என்பதைக் காட்டுகிறது. இதன் தொடர்ச்சியாக, வட மாவட்டங்களில் செல்வாக்கு மிக்க பாமகவை நோக்கி திமுக தனது பார்வையைத் திருப்பியுள்ளது.
திமுகவின் மூத்த தலைவர் ஒருவர் ராமதாஸுடன் தொலைபேசி வாயிலாகப் பேச்சுவார்த்தை நடத்தியுள்ளதாகக் கூறப்படுகிறது. பாமக தற்போது இரு அணிகளாகப் பிரிந்துள்ள சூழலில், அன்புமணி ராமதாஸ் தரப்பு அதிமுக கூட்டணியில் நீடிக்கிறது. இதனால், ராமதாஸ் தனது ஆதரவாளர்களுடன் திமுக கூட்டணிக்கு வருவாரா அல்லது தனித்துப் போட்டியிடுவாரா என்ற குழப்பம் நீடிக்கிறது. இருப்பினும், வன்னியர் சமூகத்தின் வாக்குகளை அறுவடை செய்ய ராமதாஸை எப்படியாவது கூட்டணியில் இணைத்துவிட வேண்டும் என்பதில் திமுக உறுதியாக உள்ளது.
இந்த கூட்டணி முயற்சியில் ஒரு முக்கிய சிக்கலாக விடுதலை சிறுத்தைகள் கட்சி பார்க்கப்படுகிறது. பாமக இருக்கும் கூட்டணியில் தாங்கள் இருக்க மாட்டோம் என்று விசிக ஏற்கனவே கூறி வரும் நிலையில், ராமதாஸை உள்ளே கொண்டு வந்தால் திருமாவளவனை எவ்வாறு சமாதானப்படுத்துவது என்பது திமுகவிற்கு ஒரு பெரும் சவாலாக இருக்கும். ஒட்டுமொத்தத்தில், தேர்தலுக்கு முன்பாக தனது அணியைப் பலப்படுத்த திமுக எடுக்கும் இந்த காய நகர்த்தல்கள் தமிழக அரசியலில் மிகுந்த எதிர்பார்ப்பை ஏற்படுத்தியுள்ளன.