தமிழக அரசியல் களத்தில் தமிழக வெற்றிக் கழகத்தின் வருகையும், கட்சி அமைப்பில் ஏற்படும் புதிய மாற்றங்களும் பெரும் விவாதப் பொருளாக மாறியுள்ளன. குறிப்பாக, தவெகவின் வலுவான கட்டமைப்பிற்கு ஈடுகொடுக்கும் வகையில், திமுக தனது அமைப்பு விதிகளில் அதிரடி சீர்திருத்தங்களை மேற்கொண்டு வருகிறது. இதில் இளைஞர்களுக்கு அதிக வாய்ப்பளிக்கும் நோக்கிலும், ஜென் ஸி தலைமுறையைக் கவரும் வகையிலும் கட்சிப் பதவிகளுக்கு வயது வரம்பு நிர்ணயம் செய்யப்பட்டுள்ளது.
புதிய மாற்றங்களின்படி கிளைச் செயலாளர், பேரூர், நகரச் செயலாளர் மற்றும் மாவட்டச் செயலாளர் உள்ளிட்ட பதவிகளுக்கு வயது வரம்புகள் வகுக்கப்பட்டுள்ளன. மேலும், ஒரே பதவியில் குறிப்பிட்ட எண்ணிக்கையிலான முறை மட்டுமே தொடர முடியும் என்ற புதிய விதியும் அமல்படுத்தப்பட்டுள்ளது. இந்த நடவடிக்கையால் மூத்த நிர்வாகிகள் பலரின் பதவிகள் மாறும் சூழல் உருவாகியிருந்தாலும், கட்சி அமைப்பை இளமையாக்கவும் புதுப்பிக்கவும் தலைமையால் இந்த முடிவு எடுக்கப்பட்டுள்ளதாகக் கூறப்படுகிறது.
இத்தகைய மாற்றங்கள் குறித்து ஊடகவியலாளர்கள் எழுப்பிய கேள்விக்கு, திமுக மூத்த தலைவரும் முன்னாள் அமைச்சருமான பெரியசாமி மிகவும் அமைதியான முறையில் பதிலளித்த வீடியோ சமூக வலைதளங்களில் வைரலாகி வருகிறது. செய்தியாளர்களின் கேள்விகளுக்கு எவ்வித பதற்றமுமின்றி கடலை சாப்பிட்டபடியே பதிலளித்த அவர், “எல்லோருக்கும் வாய்ப்பு வர வேண்டும்; எங்களுக்கு கீழ் இருப்பவர்களுக்கும் வாய்ப்பு கிடைக்க வேண்டும்” என்று கூறி தலைமையின் முடிவை முழுமையாக வரவேற்பதாகத் தெரிவித்தார்.
அரசியல் களத்தில் நிலவும் காரசாரமான விவாதங்களுக்கு மத்தியிலும், மூத்த நிர்வாகிகளின் இந்த கூலான அணுகுமுறையும், இளைஞர்களுக்கான இடஒதுக்கீடு குறித்த சாதகமான பதிலும் கட்சிக்குள் நிலவும் அமைதியைக் காட்டுகிறது. தவெகவின் வளர்ச்சிக்கு மத்தியில், திமுக மேற்கொள்ளும் இந்த உட்கட்சி சீர்திருத்தங்கள் தமிழக அரசியலில் புதிய பரிமாணத்தை ஏற்படுத்தியுள்ளன.