விருதுநகரில் நடைபெற்ற தேர்தல் பிரசாரக் கூட்டத்தில் பங்கேற்ற தமிழக முதல்வர் மு.க.ஸ்டாலின், திமுக மற்றும் அதன் கூட்டணி கட்சி வேட்பாளர்களுக்கு ஆதரவாகத் தீவிர வாக்கு சேகரிப்பில் ஈடுபட்டார். விருதுநகர் மாவட்டத்தின் சிறப்புகளான சிவகாசி பட்டாசு, திருவில்லிபுத்தூர் பால்கோவா மற்றும் சாத்தூர் பலகாரங்களைச் சுட்டிக்காட்டிப் பேசிய அவர், இந்தப் பகுதி தமிழகத்தின் மிக முக்கியமான தொழில் மற்றும் கலாச்சார மையமாக விளங்குவதைப் பெருமையுடன் குறிப்பிட்டார். குறிப்பாக, ‘கல்வி கண் திறந்த’ காமராஜர் பிறந்த இந்த மண்ணிற்கு வருவதில் தான் மட்டற்ற மகிழ்ச்சி அடைவதாகக் கூறிய ஸ்டாலின், ஈரோடு பெரியாருக்கும் காஞ்சி அண்ணாவிற்கும் எவ்வளவு முக்கியமோ, அதேபோல் விருதுநகர் காமராஜருக்கு முக்கியமானது என்று புகழாரம் சூட்டினார்.
தனது உரையின் போது பாஜக மற்றும் அதன் கொள்கைகளை மிகக் கடுமையாகச் சாடிய முதல்வர், தமிழ் மொழியின் மீது பாஜகவிற்கு எப்போதுமே ஒருவித வெறுப்புணர்வு இருப்பதாகக் குற்றம் சாட்டினார். தமிழ் மீது பாஜகவுக்கு எப்போதும் வெறுப்புதான். சங்கி கூட்டத்தினர் காமராஜரை டெல்லியில் வீட்டோடு வைத்து கொளுத்த பார்த்தார்கள். அரசியல் கடந்து தனிப்பட்ட முறையிலும் எனக்கு காமராஜர் மீது மிகுந்த மரியாதை உண்டு. மறைந்த பெருந்தலைவர் காமராஜர் மீது தனக்குள்ள தனிப்பட்ட மரியாதையைப் பகிர்ந்துகொண்ட அவர், உடல்நிலை குன்றியிருந்த காலத்திலும் காமராஜர் தனது திருமணத்திற்கு நேரில் வந்து வாழ்த்திய நெகிழ்ச்சியான நினைவை நினைவு கூர்ந்தார். மேலும், மத்தியில் மீண்டும் என்.டி.ஏ. ஆட்சி அமைந்தால் தமிழகத்தின் எதிர்காலம் மற்றும் உரிமைகள் கேள்விக்குறியாகிவிடும் என்றும், அத்தகைய சூழலைத் தமிழக மக்கள் கற்பனை செய்து கூடப் பார்க்க முடியாது என்றும் எச்சரித்த அவர், கூட்டணி வேட்பாளர்களைப் பெருவாரியான வாக்கு வித்தியாசத்தில் வெற்றி பெறச் செய்யுமாறு பொதுமக்களிடம் கேட்டுக்கொண்டார்.