திமுகவில் மாவட்டச் செயலாளர்களுக்கான பதவி முறையில் பல்வேறு முக்கிய மாற்றங்களைச் செய்ய கட்சி தலைமை முடிவு செய்துள்ளதாகத் தகவல்கள் வெளியாகியுள்ளன. மூர்த்தி, எம்.ஆர்.கே. பன்னீர்செல்வம், தா.மோ. அன்பரசன் உள்ளிட்ட மூத்த நிர்வாகிகள் பலர் தொடர்ந்து மூன்று முறைகளுக்கு மேல் பதவி வகித்ததன் காரணமாகப் பொறுப்புகளை இழக்கக்கூடும் என எதிர்பார்க்கப்படுகிறது. இளைஞர்கள் மற்றும் பெண்களின் அரசியல் ஈர்ப்பு வேறு திசைகளில் நகர்வதை உணர்ந்து, உட்கட்சி அமைப்பில் இளைஞர்களுக்கு அதிக வாய்ப்பளிக்கும் வகையில் தலைமுறை மாற்றத்திற்கான தீவிர முயற்சியில் தலைமை இறங்கியுள்ளது.
கட்சியின் கட்டமைப்பு மாற்றத்தின் ஒரு பகுதியாக, மாவட்டச் செயலாளர்களுக்கு 70 வயது வரம்பு நிர்ணயம், அதிகபட்சம் 3 முறை மட்டுமே பொறுப்பு, மற்றும் ஜனநாயக முறையில் தேர்தல் மூலம் நிர்வாகிகள் தேர்வு போன்ற தீர்மானங்கள் கொண்டுவரப்பட்டுள்ளன. மேலும், நிர்வாக வசதிக்காக மாவட்டச் செயலாளர்களின் எண்ணிக்கையை 110 ஆக உயர்த்தத் திட்டமிடப்பட்டுள்ளது. இதன் விளைவாக, 70 வயதைக் கடந்த எ.வ. வேலு, கே.கே.எஸ்.எஸ்.ஆர். ராமச்சந்திரன், கே.என். நேரு, முத்துசாமி, ரகுபதி உள்ளிட்ட 13 மூத்த நிர்வாகிகள் தமது பதவிகளை இழக்கும் சூழல் உருவாகியுள்ளது.
அடுத்த கட்டமாக, 3 முறைக்கு மேல் மாவட்டச் செயலாளர்களாகப் பணியாற்றிய மூத்த நிர்வாகிகளின் பட்டியலையும் தலைமை தயார் செய்து வருகிறது. இதில் எம்.ஆர்.கே. பன்னீர்செல்வம், தா.மோ. அன்பரசன், பெரியகருப்பன், மூர்த்தி போன்ற முன்னாள் அமைச்சர்களின் பெயர்கள் இடம்பெற்றுள்ளன. சீனியர்களின் ஆதிக்கத்தைக் குறைத்து, புதிதாகப் பொறுப்பேற்கும் நபர்கள் மூலம் கட்சியின் களப்பணியை மேலும் சுறுசுறுப்பாக்க திமுக தலைமை முடிவு செய்துள்ளது.
மூத்த நிர்வாகிகள் சிலர் கட்சிப் பணியாளர்களிடம் உரிய மரியாதை காட்டுவதில்லை என்ற புகார்கள் தலைமையை எட்டியதைத் தொடர்ந்து, இந்த அதிரடி நடவடிக்கைகள் மேற்கொள்ளப்பட்டு வருகின்றன. இக்காலக்கட்டத்தில் வெற்றிடமாகும் மாவட்டச் செயலாளர் பணியிடங்களுக்கு திமுக இளைஞரணியைச் சேர்ந்த புதுமுகங்களுக்கும், உழைக்கும் நிர்வாகிகளுக்கும் முன்னுரிமை அளிக்கப்பட்டு ஜனநாயக வழியில் தேர்தல்கள் நடத்தப்படும் எனக் எதிர்பார்க்கப்படுகிறது.