“பதவிக்கு ஆசைப்பட்டு தளபதியை தூக்கும் திமுக MLA-க்கள்?”… அறிவாலயத்தில் நடக்கும் உச்சக்கட்ட போர்…. திரைமறைவில் ரசிக்கும் ஸ்டாலின்….!

திமுகவில் விரைவில் மேற்கொள்ளப்பட இருக்கும் அமைப்பு ரீதியான மறுசீரமைப்பு நடவடிக்கைகள், அக்கட்சியின் வட்டாரத்தில் பெரும் பரபரப்பை ஏற்படுத்தியுள்ளன. சட்டமன்றத் தேர்தல் தோல்விக்குப் பிறகு கட்சியைப் பலப்படுத்த அமைக்கப்பட்ட குழுவினர், விரைவில் தங்கள் பரிந்துரை அறிக்கையைத் தலைவர் மு.க.ஸ்டாலினிடம் வழங்கவுள்ளனர். வருகிற செப்டம்பர் மாதம் நடைபெறவிருக்கும் முப்பெரும் விழாவுக்குப் பிறகு, இந்த மாற்றங்கள் அதிகாரப்பூர்வமாக நடைமுறைக்கு வரும் என எதிர்பார்க்கப்படுகிறது. குறிப்பாக, இரு சட்டமன்றத் தொகுதிகளுக்கு ஒரு மாவட்டச் செயலாளர் என்ற புதிய விதியை நடைமுறைப்படுத்த திமுக தலைமை தீவிரமாக ஆலோசித்து வருகிறது.

மாவட்டங்களின் எண்ணிக்கையை அதிகரித்து, புதிய மாவட்டச் செயலாளர்களை நியமிப்பதன் மூலம், கட்சிக்குள் சில தலைவர்களின் “குறுநில மன்னர்” மனப்பான்மையைக் கட்டுப்படுத்த முடியும் என்று தலைமை நம்புகிறது. மேலும், இளைஞரணி நிர்வாகிகளுக்கும் புதியவர்களுக்கும் அதிக அளவில் வாய்ப்பளித்தால், அவர்கள் களத்தில் கூடுதல் வீரியத்துடன் பணியாற்றுவார்கள் என்ற கணக்கீடும் இதில் உள்ளது. உதாரணமாக, தூத்துக்குடி மாவட்டத்தை தெற்கு, வடக்கு, மத்தி என மூன்றாகப் பிரிக்கத் திட்டமிடப்பட்டுள்ள நிலையில், விளாத்திகுளம் மற்றும் ஒட்டப்பிடாரம் தொகுதிகளை உள்ளடக்கிய மத்திய மாவட்டச் செயலாளர் பதவியைக் கைப்பற்ற எம்.எல்.ஏ மார்க்கண்டேயன் தீவிரமாகச் செயல்பட்டு வருவதாகக் கூறப்படுகிறது.

இந்தச் சூழலில், புதிதாக உருவாகும் மாவட்டச் செயலாளர் பதவிகளைப் பிடிக்க நிர்வாகிகளிடையே கடுமையான போட்டி நிலவுகிறது. தமிழக வெற்றிக் கழகத் தலைவர் விஜய்க்கு எதிராக திமுக எம்.எல்.ஏ-க்களும் நிர்வாகிகளும் திடீரெனக் காட்டமான விமர்சனங்களை முன்வைப்பதன் பின்னணியில் இந்த உள்கட்சிப் போட்டியே பிரதான காரணமாகப் பார்க்கப்படுகிறது. தவெக-வை எந்த அளவுக்கு ஆக்ரோஷமாக எதிர்கொள்கிறார்களோ, அந்த அளவுக்குக் கட்சித் தலைவரின் கவனம் தங்கள் மீது திரும்பும் என்றும், கைது நடவடிக்கை போன்ற சூழல்கள் ஏற்பட்டால் அது தங்களின் பத வாய்ப்பை உறுதி செய்யும் என்றும் சில நிர்வாகிகள் கணக்கு போடுகிறார்கள்.

தேர்தல் தோல்விக்குப் பிறகு பெரும்பாலான நிர்வாகிகள் அமைதி காத்து வரும் நிலையில், தவெக-வுக்கு எதிராக வீரியத்துடன் களமிறங்கும் நிர்வாகிகளின் செயல்பாட்டை திமுக மேலிடமும் ரசிப்பதாகத் தெரிகிறது. கட்சிக்குள் செல்வாக்கையும் தலைமையின் கவனத்தையும் பெற நிர்வாகிகள் எடுக்கும் இந்த அதிரடி உத்திகள், தமிழக அரசியல் களத்தில் தவெக – திமுக இடையிலான மோதலை மேலும் சூடேற்றியுள்ளன. வரும் செப்டம்பருக்குப் பிறகு கட்சிக்குள் நடக்கும் நியமனங்களே இந்த ஆவேசப் பேச்சுகளுக்குக் கிடைத்த பலனைத் தீர்மானிக்கும்.