‘நானும் டாக்டர் தான்’… 10th படிச்சிட்டு ஆங்கில மருத்துவமா?… மக்கள் உயிரோடு விளையாடிய போலி டாக்டர்… சுகாதாரத் துறை அதிரடி ரெய்ட்… போலீஸ் தீவிர ஆக்சன்…!

திண்டுக்கல் மாவட்டம் நத்தம் மற்றும் அதன் சுற்றியுள்ள கிராமப் பகுதிகளில் உரிய தகுதியின்றி போலி மருத்துவர்கள் ஆங்கில மருத்துவம் பார்த்து வருவதாக மாவட்ட நிர்வாகத்திற்கு தொடர்ந்து பல்வேறு புகார்கள் வந்த வண்ணம் இருந்தன. இந்த புகார்களின் அடிப்படையில், மாவட்ட சுகாதாரத் துறையினர் அப்பகுதிகளில் திடீர் சோதனையில் ஈடுபட்டனர். திண்டுக்கல் மாவட்ட நலப்பணிகள் இணை இயக்குநர் பாரதி தலைமையில், நத்தம் வட்டார மருத்துவ அலுவலர் அஜாம் உள்ளிட்ட சுகாதாரத் துறை அதிகாரிகள் நத்தம் மற்றும் செந்துறை பகுதிகளில் தீவிர ஆய்வு மேற்கொண்டனர்.

இந்தச் சோதனையின் போது, செந்துறை பேருந்து நிலையப் பகுதியில் கிளினிக் வைத்து ஒருவர் சட்டவிரோதமாக ஆங்கில மருத்துவம் பார்த்து வந்தது அதிகாரிகளால் கண்டறியப்பட்டது. அவர்களிடம் நடத்திய தீவிர விசாரணையில், மருத்துவம் பார்த்து வந்தவர் பாப்பாத்தி (55) என்பதும், அவர் பத்தாம் வகுப்பு வரை மட்டுமே படித்துள்ளார் என்பதும் தெரியவந்தது. எவ்வித மருத்துவப் படிப்பும் படிக்காமல் பொதுமக்களின் உயிரோடு விளையாடி வந்த அந்தப் போலி பெண் மருத்துவரைப் பிடித்து அதிகாரிகள் உடனடியாக நத்தம் காவல் நிலையத்தில் ஒப்படைத்தனர்.

சம்பவம் குறித்து வழக்குப் பதிவு செய்த நத்தம் காவல்துறையினர் பாப்பாத்தியைக் கைது செய்து தீவிர விசாரணை மேற்கொண்டு வருகின்றனர். நத்தம் மற்றும் அதன் சுற்றுவட்டாரப் பகுதிகளில் இன்னும் பல போலி மருத்துவர்கள் நடமாட்டம் இருப்பதாகத் தெரிவிக்கும் அப்பகுதி பொதுமக்கள், மக்களின் உடல்நலனைக் கருத்தில் கொண்டு நத்தம் முழுவதும் இயங்கி வரும் அனைத்து தனியார் கிளினிக்குகளிலும் சுகாதாரத் துறையினர் உரிய ஆய்வு நடத்த வேண்டும் என கோரிக்கை விடுத்துள்ளனர்.