சபைக்கே வராத திமுக.. திடீரென சட்டமன்றத்தில் உதயநிதி போட்ட “மெகா ஸ்கெட்ச்”… CM விஜய்க்கு உதயநிதி தந்த “திடீர் சர்ப்ரைஸ்”….!

மக்களவை தொகுதிகள் மறுவரையறை செய்யப்படுவதால் தமிழ்நாட்டின் பிரதிநிதித்துவம் குறையும் என்ற அச்சம் நிலவி வரும் சூழலில், தொகுதி மறுவரையறைக்கு எதிரான மாநில அரசின் தீர்மானத்தை முதலமைச்சர் விஜய் சட்டமன்றத்தில் தாக்கல் செய்தார். முன்னதாக, இது தொடர்பாக ஆலோசிக்க அனைத்து நாடாளுமன்ற உறுப்பினர்களுக்கும் முதலமைச்சர் சார்பில் அழைப்பு விடுக்கப்பட்டிருந்த நிலையில், திமுக, அதிமுக உள்ளிட்ட கட்சிகள் அதில் பங்கேற்கவில்லை. எனினும், தற்போது சட்டமன்றத்தில் தாக்கல் செய்யப்பட்டுள்ள இந்த முக்கிய தீர்மானத்திற்கு அதிமுக மற்றும் பாஜக எதிர்ப்பைப் பதிவு செய்துள்ள நிலையில், பிரதான எதிர்க்கட்சியான திமுக தனது முழு ஆதரவை அளித்துள்ளது.

இத்தீர்மானத்தின் மீதான விவாதத்தில் பேசிய எதிர்க்கட்சித் தலைவர் உதயநிதி ஸ்டாலின், மக்கள் தொகை கட்டுப்பாட்டைச் சிறப்பாக நடைமுறைப்படுத்திய தமிழ்நாட்டின் எம்பிக்கள் எண்ணிக்கை எந்தக் காரணம் கொண்டும் குறையக் கூடாது என்பதில் திமுக உறுதியாக இருப்பதாகத் தெரிவித்தார். 2026-ஆம் ஆண்டு மக்கள் தொகை கணக்கெடுப்பின் அடிப்படையில் தொகுதிகள் மாற்றியமைக்கப்பட்டால், அது வட மாநிலங்களுக்குச் சாதகமாகவும், தென் மாநிலங்களுக்குப் பெருத்த பின்னடைவாகவும் அமையும் என எச்சரித்த அவர், தற்போதைய நாடாளுமன்றப் பிரதிநிதித்துவ விகிதாச்சாரமான 7.18 சதவீதம் எக்காரணத்தைக் கொண்டும் குறையக்கூடாது என வலியுறுத்தினார்.

தென் மாநிலங்களின் உரிமைகளைப் பாதுகாக்க திமுக ஏற்கனவே பல தொடர் நடவடிக்கைகளை எடுத்துள்ளதைச் சுட்டிக்காட்டிய அவர், தென் மாநில முதலமைச்சர்களுக்குக் கடிதம் எழுதியது, கூட்டுக் நடவடிக்கைக் குழு அமைத்து 25 ஆண்டுகளுக்குத் தொகுதி மறுவரையறையை ஒத்திவைக்கக் கோரியது மற்றும் நாடாளுமன்றத்தில் மசோதா நகலை எரித்து போராட்டம் நடத்தியது போன்ற வரலாற்றுச் நிகழ்வுகளை நினைவு கூர்ந்தார். ஒன்றிய அரசு மீண்டும் இச்சட்டத்தைக் கொண்டுவர முயற்சிக்கும் பட்சத்தில், சட்ட வல்லுநர்களின் ஆலோசனையின்படி 1971 முதல் 2026 வரை உள்ள நிலையை மேலும் 25 ஆண்டுகளுக்கு நீட்டிக்கும் வகையில் புதிய சட்டத் திருத்தம் கொண்டு வரப்பட வேண்டும் என்றும் அவர் குறிப்பிட்டார்.

மகளிர் 33 சதவீத இட ஒதுக்கீட்டு மசோதாவை திமுக முழுமையாக வரவேற்பதாகத் தெரிவித்த உதயநிதி ஸ்டாலின், அம்மசோதாவுக்காகத் தொகுதி மறுவரையறை செய்யப்பட்டாலும் கூட, அது 1971-ஆம் ஆண்டின் மக்கள் தொகையின் அடிப்படையிலேயே செய்யப்பட வேண்டும் என்ற நிபந்தனையை முன்வைத்தார். தமிழ்நாடு எம்பிக்களின் எண்ணிக்கை குறையக் கூடாது என்பதில் திமுகவின் நிலைப்பாடு மிகத் தெளிவாக உள்ளதாகக் கூறி, முதலமைச்சர் விஜய் சட்டமன்றத்தில் கொண்டு வந்த இந்த எதிர்ப்புத் தீர்மானத்தை திமுக சார்பில் வரவேற்பதாக உறுதியளித்தார்.